شىمكەنتتە 40 نەمەرەسى بار ەرلى-زايىپتى ەكىنشى رەت ۇيلەندى
پورتالدىڭ مالىمەتىنشە، شىمكەنت قالاسىنىڭ جۇمىسپەن قامتۋ جانە الەۋمەتتىك باعدارلامالار بولىمىندە «التىن توي»، «كۇمىس توي» يەلەرى مەن جاڭادان وتاۋ تىككەن جاس جۇبايلارعا رەسمي تۇردە نەكە كۋالىگى تاپسىرىلدى.
«التىن توي» يەلەرى امانگەلدى جانە انار نابيەۆتەر 50 جىل بۇرىن نەكە قيعان. 50 جىلدان استام ءبىر شاڭىراق استىندا تۇرىپ، ءومىر وتكەلدەرىنەن قول ۇستاسىپ ءوتىپ كەلە جاتقان نابييەۆتەر نەكە جۇزىكتەرىمەن الماسىپ، تاعى جارتى عاسىر ءبىر-بىرىنە ادال بولۋعا ۋادە ەتتى.
«ءبىز باقىتتى وتباسىمىز دەپ ايتا الامىز. ويتكەنى 40 نەمەرە، 16 شوبەرەمىز بار، تاعى ەكى شوبەرەمىز جىلدىڭ اياعىندا ومىرگە كەلەدى. ءتورت بالامىزدى وقىتتىق، بارلىعى جاقسى جۇمىستا ىستەيدى. ەكەۋمىزدىڭ سىيلاستىعىمىزعا ەل قىزىعادى»، - دەدى نابيەۆتەر. شيرەك عاسىر وتاۋلاسىپ، تاعى ءبىر نەكە كۋالىكتەرىن قولدارىنا العان كۇمىس توي يەلەرى - عابيت تاشەنوۆ پەن گۇلجان مالدىبەكوۆا. ۇلگىلى اكە، ونەگەلى انا اتانىپ وتىرعان توي يەلەرى ءومىر باقي باقىتتى، ەڭ باستىسى، بىرگە عۇمىر كەشۋدىڭ قۇپياسىن جاقسى بىلەدى.
«25 جىل بۇرىن عانا وسىنداي كۇيدە بولعان ەدىك، كەرەمەت اسەردە تۇرمىز. كوزدى اشىپ جۇمعانشا شيرەك عاسىر ءوتىپتى. باقىتتى عۇمىر كەشۋ ءۇشىن، ايەلدەر، ياعني، قىز- كەلىنشەكتەرگە سابىرلى بولۋ كەرەك. ەكىنشى جارتىسىنىڭ كوڭىل- كۇيى، ءۇي جۇمىستارىنىڭ باسىم بولىگى سولارعا جۇكتەلەدى»، - دەدى ولار.
نەكە قيۋ كەزەگى جاس وتاۋ يەلەرىنە كەلدى. جاس جۇبايلارعا اعا بۋىن وكىلدەرى «ءبىزدىڭ جولىمىزدى بەرسىن»، دەپ اق باتاسىن بەردى.
«جاڭا ومىرگە قادام باستىق. ءبىر-ءبىرىمىزدى ءسۇيىپ قوسىلدىق. ارينە، ءدال بۇگىنگىدەي اعا بۋىن وكىلدەرىنەن باتا الىپ جولىمىز بولدى. وسى كىسىلەردىڭ جولىن بەرە بەرسىن»، - دەدى قۋاندىق زەنوللايەۆ پەن ءجاميليا ءىلياس. ۇيىمداستىرۋشىلاردىڭ مالىمەتىنشە، جىل باسىنان بەرى 2420 نەكە قيۋ تىركەلگەن.