ۋفاداعى كورمەدە باتىس قازاقستاندىق سۋرەتشىلەردىڭ 40 تان استام تۋىندىسى قويىلدى
وسىعان وراي ورالدان ب ق و سۋرەتشىلەر وداعىنىڭ ءتوراعاسى، م. وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ پروفەسسورى قۋاندىق مادىر جانە ساتىبالدى قۇلبەكوۆ، نۇربەك جاردەموۆ سەكىلدى وڭىرگە تانىمال قىلقالام شەبەرلەرى ۋفاعا ارنايى باردى.
باشقۇرتستان رەسپۋبليكاسى مادەنيەت ءمينيسترىنىڭ ورىنباسارى شاميل ابدراقوۆ شىمىلدىعىن اشقان شاراعا باشقۇرتستان سۋرەتشىلەر وداعىنىڭ ءتوراعاسى، رەسەيدىڭ ەڭبەك سىڭىرگەن ونەر قايراتكەرى حاتيپ فازىلوۆ جانە باسقا ونەر مايتالماندارى، سۋرەتشىلەر مەن ساۋلەتشىلەر قاتىستى. ولار وسىناۋ كورمەنىڭ ماڭىزدىلىعىنا توقتالىپ، الداعى ۋاقىتتا دا مۇنداي بايلانىستىڭ جالعاساتىنىن جەتكىزدى.
باستاپقىدا ورالدا وبلىستىق دەڭگەيدە ۇيىمداستىرىلىپ، كەيىن رەسپۋبليكالىق، حالىقارالىق سيپات العان «جازيرا جايىق» كورمەسىنە بۇدان بۇرىن رەسەيدىڭ استراحان، ۆولگوگراد، سامارا، ساراتوۆ، ورىنبور وبلىستارىنىڭ سۋرەتشىلەرى قاتىسقان ەدى.
بۇل جولى ۋفاداعى العاشقى كورمەگە وتارباي كەندىر، نادەجدا تيحونوۆا، قانات ورازوۆ، بەكجان جۇمابايەۆ، مەلس وتاروۆ، جاننا قۇلبەكوۆا، نۇربول ءامىرجانوۆ سىندى بارلىعى ون سۋرەتشىنىڭ 40 تان استام تۋىندىسى قويىلدى.
«تۋعان جەر» باعدارلاماسى اياسىندا كورمەنى ۇيىمداستىرۋداعى باستى ماقسات - ونەر تۋىندىلارى ارقىلى ەلىمىزدىڭ تاريحى مەن مادەنيەتىن پاش ەتۋ، دوستىق قارىم-قاتىناستى كەڭەيتىپ، تاجىريبە الماسۋ.
«باشقۇرت پەن قازاق - ەجەلدەن ىرگەسى اجىراماعان، تۇرمىسى مەن تىلىندە، سالت-ساناسىندا ۇقساستىقتار كوپ، تۋىسقان حالىقتار. سوندىقتان مۇنداي ءىس-شارالار جالعاسىن تابادى. باشقۇرت باۋىرلار الداعى جىلى ورالعا كەلىپ، وزدەرىنىڭ ونەر تۋىندىلارىن اق جايىق جۇرتشىلىعىنىڭ نازارىنا ۇسىناتىن بولادى. وسى ورايدا كورمەنى ۇيىمداستىرۋعا قولداۋ تانىتقان قازاقستان حالقى ب ق و اسسامبلەياسىنا، ءتوراعا ورىنباسارى عايسا قاپاقوۆقا، قول ۇشىن سوزعان ازاماتتاردىڭ بارىنە ريزاشىلىعىمىزدى بىلدىرەمىز. قىلقالام شەبەرلەرىن جاڭا تۋىندىلار جاساۋعا ىنتالاندىراتىن، شىعارماشىلىق الەۋەتىن ارتتىرىپ، بەينەلەۋ ونەرىنىڭ ۇزدىك ۇلگىلەرىن ناسيحاتتاۋعا سەپتىگىن تيگىزەتىن وسىنداي شارالار كوبەيە بەرسە، ەش ۇتىلماسىمىز انىق»، دەدى «قازاقپارات» تىلشىسىنە قۋاندىق مادىر.
ايتا كەتەيىك، كورمە 25- مامىرعا دەيىن جۇمىس جاسايتىن بولادى.
اۆتور: ەلجان ەرالى