توقتار اۋباكىروۆ 40 جىلدان اسا وتاسقان ورىس كەلىنشەگى تۋرالى ايتتى
ول ءالى كۇنگە دەيىن جۇبايى ەكەۋىنىڭ قارىم-قاتىناسى جىلى ەكەنىن اتاپ ءوتتى. ءتىپتى، جىراققا كەتكەن جاعدايدا تاتيانانى ساعىناتىنىن جاسىرمادى.
بۇل تۋرالى عارىشكەر امان تاسىعاننىڭ «Talk Like» باعدارلاماسىندا.
«ءبىز ءبىر-ءبىرىمىزدى تاپتىق. كوپ جىلدان بەرى قول ۇستاسىپ كەلە جاتىرمىز. بيىل 41 جىل تولدى. بۇگىنگە دەيىن مەن ول كىسىسىز بولا المايمىن، ال مەن ءبىر جاققا كەتىپ قالسام، ول كىسى مەنى ىزدەيدى. ءالى ءبىر-ءبىرىمىزدى ىزدەپ ءجۇرمىز.
ءبىراق مەن عاشىقتىق دەگەن ءسوزدى ءالى كۇنگە دەيىن تۇسىنە المايمىن. عاشىقتىق ويىنشىققا، تاعامعا بولادى. كۇندە ءبىر كىسىگە عاشىق بولا المايدى. ءبىر كىسىمەن مىنەزدەس بولۋ كەرەك. ويباي عاشىق دەپ ءبىر-ءبىرىن ءسۇيىپ قوسىلادى دا، ەرتەڭگى كۇنى اجىراسادى. ءبىرىڭدى- ءبىرىڭ قادىرلەۋ كەرەك. سەنىڭ مىنەزىڭە لايىق، سەنىڭ ويىڭدا جۇرەتىن، سەنى ءاردايىم قولدايتىن جان بولۋى كەرەك. سەنىكى دۇرىس ەمەس ەكەنىن تۇسىنسە دە، سەنىڭ قاسىڭدامىن دەپ ايتۋ كەرەك. تاتيانا مەنىڭ قاسىمدا بولىپ كەلە جاتىر»، - دەيدى توقتار اۋباكىروۆ.
عارىشكەر جاسى كەلسە دە، ماحابباتتى جىر قىلىپ جۇرگەن قالامگەرلەردى تۇسىنبەيتىنىن ايتتى.
«جاسىراتىنى جوق، كەزىندە قىزدار كوپ قارادى. ءوزىم 10 جىلداي ءبىر قىزبەن ارالاستىم، ءبىراق بۇيىرمادى. سول كەزدەگى ماحابباتىم شىعار. جاس كەزدە جارىپ ۇشاتىن، نايزاعاي بولاتىن ماحاببات جاس كەلە وشەدى ەكەن. ءبىراق ءبىزدىڭ اقىندارىمىز بار، 70 كە كەلىپ ماحاببات دەيدى. مەن ولارعا شىنىندا قايران قالامىن...»، - دەدى ول.