وزبەكستاندا 400-گە جۋىق قازاق مەكتەبى بار

None
None
نۇر- سۇلتان. قازاقپارات - قازاقتىڭ تاريحي تۇلعالارى بەينەلەنگەن كورنەكى قۇرال مۇنداعى ءاربىر سىنىپقا ىلىنگەن، دەپ حابارلايدى «حابار 24».

ورەندەر مەكتەپ پارتاسىنان رۋحاني باي مۇرانى تانىپ وسەدى. بۇل - تاشكەنت وبلىسىنداعى قانداستارىمىز كوپ قونىستانعان شىرشىق قالاسى. بابالارىنىڭ بايىرعى اتا قونىس، جاز جايلاۋى. قالادا قازاق تىلىندە ءبىلىم بەرەتىن بەس مەكتەپ بار. زاماناۋي تۇرعىدا جابدىقتالعان ءبىلىم ۇيالارى وقىتۋ پروتسەسىن لاتىن جانە كيريلل قارپىنە ساي جۇرگىزەدى.

تاياۋدا قابىلدانعان وزبەكستان پرەزيدەنتىنىڭ قاۋلىسىنا ساي مەكتەپ تۇلەكتەرى كەم دەگەندە ءبىر مۋزىكالىق اسپاپتى مەڭگەرۋگە ءتيىس. وزبەكتىكى نەمەسە قازاقتىكى بولسىن دەگەن شەكتەۋ جوق. بۇل كەيىن مەكتەپ بىتىرگەندە كادەگە جارايدى. قازىر بارلىق مەكتەپتە ارنايى ۇيىرمەلەر اشىلىپ جاتىر. سونىڭ ىشىندە دومبىرا سىنىپتارى دا بار. قانداستاردىڭ ۇلتتىق اسپابىندا ويناپ، كۇمبىرلىتە كۇي توگەتىن قابىلەتى كەيىن اتتەستاتقا جازىلادى.

مۇندا جاندوس سەكىلدى تاريحي وتانىندا ءبىلىم الۋدى كوزدەگەندەر كوپ. ورەندەر مەملەكەتتىك ەمتيحان تاپسىرۋعا قازىردەن قىزۋ دايىندىق ۇستىندە.

جاندوس جامالوۆ، مەكتەپ وقۋشىسى:

- بۇل جەردە وقۋ جاقسى. كەلەشەكتە قازاقستانعا وقۋعا تۇسكىم كەلەدى. زاڭ ماماندىعىنا. جەكە قىزىعۋشىلىعىم - كىتاپ وقۋ، جاتتىعۋلار جاساۋ. دوستارمەن ارالاسىپ تۇرامىز.

جالپى وزبەكستاندا قازاق تىلىندە ءبىلىم بەرەتىن 361 مەكتەپ بار. دەنى تاشكەنت وبلىسى مەن قاراقالپاقستان رەسپۋبليكاسىندا ورنالاسقان. وقۋلىقتار ەكى ەلدىڭ ءبىلىم بەرۋ جۇيەسىنە، تاريحى مەن ءداستۇر- سالتىنا نەگىزدەلەدى.

لەيلو رۋستاموۆا، حالىق ءتالىمى مينيسترلىگىنىڭ باسپا ءسوز حاتشىسى:

- وزبەكستاندا 7 تىلدە ءبىلىم بەرىلەدى. ەلىمىز كوپ ۇلتتى بولعاندىقتان بارلىعىنا تەڭ جاعداي جاسالىپ وتىر. قازاق تىلىندەگى مەكتەپتەرگە كەلسەك، سانى - 361. جارتىسىندا وقىتۋ پروتسەسى بالالاردىڭ انا تىلىنە ساي جۇرگىزىلەدى. قالعانى - ارالاس.

شەتەلدەگى قانداستارعا جىل سايىن تاريحي وتانىنداعى وقۋ ورىندارىنان گرانت بولىنەدى. الدىڭعى قاتارلى 10 ۋنيۆەرسيتەتتىڭ ديپلومى وزبەكستاندا عانا ەمەس، الەمنىڭ بىرنەشە مەملەكەتىندە جارامدى. قاراكوز قانداستار ەكى ەلدە دە جوعارى ءبىلىم الۋ قۇقىعىنا يە. تاشكەنت، گۇلىستان پەداگوگيكالىق ينستيتۋتىندا قازاق ءتىلى مەن ادەبيەتى كافەدراسى بار. نۇكىس مەملەكەتتىك ۋنيۆەرسيتەتى دە وسى باعىتتا ءبىلىم بەرەدى.

اسەم وتەپبەرگەنوۆا، مەكتەپ مۇعالىمى:

- اعىلشىن، ورىس ءتىلىن الىپ بارامىز. بارلىق تىلدەردى ۇيرەنگەن. ارنايى قازاق سىنىبىندا وقىساق تا، وزبەك ينستيتۋتتارىنا تۇسۋگە مۇمكىندىك بەرگەن.

جاقسىلىق جورىقبايەۆ، شىرشىق قالاسى قازاق مادەني ورتالىعىنىڭ ءتوراعاسى:

- قازاقتاردىڭ كوبى قازاقشا وقۋعا تۇسكەندى جاقسى كورەدى. كوبى قازاقستانعا بارىپ وقىپ كەپ جاتىر. وعان قازاقستان ۇكىمەتىنە ۇلكەن راقمەت ايتامىز. تامىرىن تەرەڭگە تارتقان قازاق- وزبەك قاتىناسى كەز كەلگەن سالادا ۇزىلمەي كەلەدى. بۇل - ەكى ەل اراسىنداعى بەرىك بايلانىس، مىزعىماس دوستىقتىڭ بەلگىسى.

قازاق مەكتەپتەرىندە اشىلعان دومبىرا ۇيىرمەلەرى دە كوپتىڭ كوكەيىندەگىسىن ءدوپ باسقانداي.

www.24.kz



سوڭعى جاڭالىقتار