بيولوگيالىق قاۋىپسىزدىك ماماندارىن دايارلاۋعا 400 گرانت بولىنەدى

نۇر- سۇلتان. قازاقپارات - بيولوگيالىق قاۋىپسىزدىك سالاسىندا قاتەرلى ميكروورگانيزمدەرمەن تىكەلەي جۇمىس ىستەيتىن ماماندار دايىنداۋ ءۇشىن 400 گرانت ءبولىنۋى مۇمكىن.

ق ر دەنساۋلىق ساقتاۋ ۆيتسە- ءمينيسترى - باس سانيتار دارىگەر ەرلان قياسوۆ ءماجىلىس دەپۋتاتتارىنا وسىنداي ۇسىنىس ايتتى، دەپ حابارلايدى قازاقپارات ءتىلشىسى.

اتالمىش باستاما «قازاقستان رەسپۋبليكاسىنىڭ بيولوگيالىق قاۋىپسىزدىگى تۋرالى» زاڭ جوباسىنىڭ اياسىندا كوتەرىلىپ وتىر.

«بىزدە ماماندار جوق ەمەس، بار. ءبىراق تولىققاندى بيولوگيالىق قاۋىپسىزدىكتى قامتاماسىز ەتۋگە جەتكىلىكسىز. ۇسىنىلىپ وتىرعان زاڭ جوباسىندا وسى سالاعا جاڭا مامانداردى بارىنشا كوبىرەك تارتۋ كوزدەلگەن. سانيتارلىق- ەپيدەميولوگيالىق بەيىندەگى ماماندار دايىنداۋعا 400 گرانت ءبولۋ قاراستىرىلعان. ارينە، ولاردى بۇل سالاعا مامانداندىرۋ ماماننىڭ وعان دەيىن العان بازالىق بىلىمىنە ساي جۇرگىزىلەدى. ويتكەنى بيولوگيالىق قاۋىپسىزدىك سالاسىنىڭ مامانى ءوزى جاۋاپ بەرەتىن سالانىڭ دا مامانى بولۋى كەرەك. ەگەر ۆەتەريناريا سالاسىنداعى بيولوگيالىق قاۋىپسىزدىك مامانى بولسا، ۆەتەريناريا سالاسىنىڭ بازالىق ءبىلىمىن مەڭگەرگەن بولۋى كەرەك. وسىمدىك شارۋاشىلىعى بولسا، وعان سايكەس بازالىق ءبىلىمى بولۋ كەرەك دەگەن سياقتى. بۇل جەردە ءبىزدىڭ ايتىپ وتىرعانىمىز - بيولوگيالىق ءتىرى ورگانيزمدەرمەن جۇمىس ىستەيتىن مامانداردار. پاتوگەندەر دەپ ءبولىپ ايتىپ وتىرعانىمىز سوندىقتان»، - دەپ ءتۇسىندىردى باس سانيتار دارىگەر.

ۆيتسە- مينيستر زاڭ جوباسىنداعى بۇل ۇسىنىس قابىلدانسا، جوعارى وقۋ ورىندارىنىڭ قوعامدىق دەنساۋلىق ساقتاۋ فاكۋلتەتتەرىندەگى وقىتۋ باعدارلاماسى وزگەرتىلەتىنىن اتادى.

«ەلدەگى ساناۋلى جوعارى وقۋ ورنىندا قوعامدىق قاۋىپسىزدىك فاكۋلتەتتەرى بار. 400 گرانت بولىنسە، مامانداردى سول فاكۋلتەتتەر بازاسىندا وقىتامىز. ناقتى ايتساق، قازىر ونداي فاكۋلتەتتەر قاراعاندى جانە الماتى مەديتسينالىق ۋنيۆەرسيەتتەرىندە بار. وسىنداي ج و و- لار بازاسىندا سانيتارلىق- گيگيەنالىق بەيىندەگى ماماندار دايارلاۋ جوسپارلانىپ وتىر. ول ءۇشىن ءبىز وقىتۋ باعدارلاماسىن وزگەرتەمىز. سونىڭ ارقاسىندا اتالمىش باعىتتاعى ساعاتتار سانى كوبەيتىلەدى»، - دەدى ەرلان قياسوۆ.

اۆتور: ەسىمجان ناقتىباي