تۇركىستان وبلىسىندا قارلى بوراننان 400 گە جۋىق ادام قۇتقارىلدى
تۇركىستان وبلىسىندا اۆاريالىق قۇتقارۋ جۇمىستارىنىڭ ناتيجەسىندە كولىگىمەن جولدا قالىپ قويعان (17 اۋىر جۇك كولىگى، 90 جەڭىل اۆتوكولىك) 377 ادام قۇتقارىلدى. ونىڭ ىشىندە 75 ءى بالالار.
بۇل جونىندە توتەنشە جاعدايلار دەپارتامەنتىنىڭ باسقارما باستىعى تالعات دوساليەۆ وڭىرلىك كوممۋنيكاتسيالار قىزمەتىندە وتكەن بريفينگتە مالىمدەدى. تابيعي قۇبىلىسقا بايلانىستى دەپارتامەنتتە شۇعىل شتاب قۇرىلعان.
وڭىردە رەسپۋبليكالىق ماڭىزداعى اۆتوموبيل جولدارىنىڭ 2 ۋچاسكەسى جانە وبلىستىق ماڭىزداعى اۆتوموبيل جولدارىنىڭ 7 ۋچاسكەسىندە كولىكتەردىڭ جۇرۋىنە شەكتەۋ قويىلعان.
«وتكەن اپتانىڭ سوڭعى كۇندەرى جەل مەن جاۋعان قار سالدارىنان تۇركىستان، كەنتاۋ قالالارى مەن تولەبي، قازىعۇرت، ورداباسى، وتىرار، سوزاق، تۇلكىباس، سايرام اۋداندارىندا 34773 ابونەنت ەلەكتر جارىعىنسىز قالدى. قالپىنا كەلتىرۋ جۇمىستارىنا جالپى 20 بريگادا، 65 جەكە قۇرام، 18 بىرلىك تەحنيكا جۇمىلدىرىلعان. دەگەنمەن، قارلى بوران سالدارىنان زارداپ شەككەندەر جوق. وبلىس تۇرعىندارى ەگەر اۋا رايى قولايسىز بولعان جاعدايدا جولعا شىقپاعانى ابزال»، - دەدى ت. دوساليەۆ.
سونىمەن قاتار، باسپا ءسوز ءماسليحاتىندا ءسوز العان «وڭتۇستىك جارىق ترانزيت» ج ش س- نىڭ باس ديرەكتورىنىڭ ورىنباسارى ەرلان مەلدەبەكوۆتىڭ ايتۋىنشا، تۇركىستان قالاسىن جارىقپەن قايتا قامتۋ ءۇشىن 65 مامان كۇنى-ءتۇنى جۇمىس ىستەگەن. بۇگىنگى تاڭدا شاھاردا %100 جارىق بار.
نەگىزىنەن، قالادا 900 دەن استام ترانسفورماتور بولسا، ونىڭ 165 ءى عانا اتالعان مەكەمە قاراماعىندا. قالعان ترانسفورماتورلار قالالىق ينفراقۇرىلىم ءبولىمى مەن جەكە ازاماتتارعا تيەسىلى.
ەسكە سالساق، دەمالىس كۇندەرى ەلدىڭ وڭتۇستىگىندە بوران بولىپ، تۇرعىندار قۇتقارىلعانى تۋرالى جازعان بولاتىنبىز.