گەرمانيادا ەكپە جاسايتىن 400 ورتالىق اشىلادى
جالپى بۇكىل ەل اۋماعىندا ەكپە جاسايتىن 400 ورتالىق قۇرۋ كوزدەلىپ وتىر. بيلىك وكىلدەرى ۆاكسينا تەگىن بولاتىنىن جاريالادى. ونى ساتىپ الۋعا، جەتكىزۋگە جانە ورتالىقتاردى جابدىقتاۋعا بارلىق شىعىندى مەملەكەت وزىنە الاتىن بولدى.
ەگەر كۇن سايىن 100 مىڭ ەكپە جاسالاتىن بولسا، 15 ميلليون ادامعا ۆاكتسينا ەگۋ ءۇشىن 5 ايداي ۋاقىت كەتەدى. الايدا بۇل ءۇشىن ماماندار جەتىسپەيتىندىكتەن، زەينەتكە شىققان مەديتسينالىق قىزمەتكەرلەردىڭ ەڭبەگىن دە پايدالانۋ جوسپاردا بار. ساراپشىلاردىڭ پىكىرىنشە، گەرمانيادا ىندەتتىڭ تارالۋىنا توسقاۋىل قويۋ ءۇشىن حالىقتىڭ 70 پروتسەنتىنە ۆاكسينا ەگىلۋى ءتيىس. الايدا ەكپە جاساۋعا ەشكىمدى ماجبۇرلەمەيدى.
ساۋالناما ناتيجەلەرى كورسەتكەندەي نەمىستەردىڭ 53 پروتسەنتىنىڭ وزىنە ۆاكسينا ەككىزگىسى كەلىپ وتىر.
دوستمان بەرلين، قالاسىنىڭ تۇرعىنى:
- ۆاكسينا ادامعا قاۋىپسىز بولۋى كەرەك ءارى ۆيرۋس وعان بەيىمدەلمەسە عانا ءتيىمدى بولادى. سوندىقتان ازىرشە وزىمە ەكپە جاسامايمىن. الايدا مۇنى زاڭمەن مىندەتتەسە، ارينە، امال جوق. ويتكەنى مەن زاڭعا باعىناتىن ازاماتپىن.
ال يتاليا كوروناۆيرۋسقا قارسى ەگۋ شاراسىن 2021 -جىلدىڭ قاڭتارىندا باستايدى. ۆاكسينا تەگىن ءارى ەرىكتى بولادى، ياعني العىسى كەلگەن ادام عانا سالدىرادى. بۇل تۋرالى وسى ەلدىڭ دەنساۋلىق ساقتاۋ ءمينيسترى روبەرتو سپەرانتسا مالىمدەدى.
ونىڭ ايتۋىنشا، يتاليا بيلىگى 202 ميلليون دوزا ساتىپ الۋدى جوسپارلاپ وتىر. بۇل 60 ميلليوننان استام ادام تۇراتىن ەلگە ارتىعىمەن جەتۋى ءتيىس. سونداي- اق مينيستر روجدەستۆو مەن جاڭا جىلدى اتاپ ءوتۋ كەزىندە ءجۇرىس- تۇرىستى شەكتەيتىن جاڭا ەرەجەلەر ازىرلەنىپ جاتقانىن ەسكەرتتى.
ەستەرىڭىزگە سالا كەتەيىك، يتاليادا كوروناۆيرۋس جۇقتىرعاندار سانى 1 ميلليون 600 مىڭ ادامنان اسادى. ال كوز جۇمعاندار قاتارى 56 مىڭعا جەتكەن.
روبەرتو سپەرانسا، يتاليانىڭ دەنساۋلىق ساقتاۋ ءمينيسترى:
- ءبىز ۆاكتسينانى قابىلداۋدا باسىمدىق بەرىلەتىن توپتاردى ايقىندادىق. ءبىرىنشى كەزەكتە دەنساۋلىق ساقتاۋ سالاسىنىڭ قىزمەتكەرلەرى تۇر. سوسىن قارتتار ۇيلەرىنىڭ تۇرعىندارى مەن قىزمەتكەرلەرى. وسى مەكەمەلەر كوروناۆيرۋستان قاتتى زارداپ شەكتى. اۋرۋلارى دا اسقىنىپ تۇر. ۇشىنشىدەن، ەلىمىزدىڭ جاسى ەگدە ازاماتتارى.
www.24.kz