شەتەلدە جۇمىس ىستەگىسى كەلگەن 400 دەن اسا قازاقستاندىق ازامات سان سوعىپ قالعان

None
None
نۇر-سۇلتان. قازاقپارات - وزگە ەلگە كىرۋ ءۇشىن ۆيزا اپەرىپ، جۇمىسقا تۇرۋعا قاجەتتى قۇجاتتاردى ازىرلەۋگە ۋادە بەرگەن الدەبىر كومپانياعا ءارقايسىسى 700 مىڭ تەڭگەدەن جيناپ بەرگەن، دەپ حابارلايدى «حابار 24».

ءبىراق سوڭعى ساتتە كومپانيا وكىلدەرى تەرىس اينالدى. جازيرا مۇقانوۆا - جالعىزباستى انا. وتكەن جىلى قازان ايىندا ءناپاقا تابۋ ءۇشىن شەتەلگە بارۋعا شەشىم قابىلدايدى. جاۋاپكەرشىلىگى شەكتەۋلى سەرىكتەستىك «AS SENIM BUSINESS GROUP» كومپانياسى دانيا ەلىندە 7000 ەۋرو كولەمىندە جالاقى تاباسىڭ دەپ سەندىرەدى. كەلىسىمشارت جاساسقان سوڭ، ونىڭ ماقساتى جۇزەگە اسپاي قالعان.

جازيرا مۇقانوۆا، الماتى قالاسىنىڭ تۇرعىنى:

- دانياعا بارامىز دەگەن. ول جاقتا تاماق، كيىم، بارلىعى تەگىن بولادى دەدى. مەن الماتىدا جۇمىسشى بولىپ ىستەيمىن. ماعان اكە- شەشەم نەسيە الىپ بەردى. نەگىزى سىزدەر جۇمىسقا تۇراسىزدار. سىزدەر ارقىلى ءبىز اقشامىزدى قايتارىپ الامىز دەدى. ۆيزا - 1 -جىل. تاعى كوپ بونۋس بولدى. ءبىز قازاننىڭ 21 ءى كەلىسىمشارت جاساعانىز. كومپانيا وكىلدەرى 30 كۇننەن كەيىن ەۋروپاعا ءبىر جىلدىق جۇمىس ۆيزاسىن بەرۋگە ۋادە بەرگەن. ولار ءتيىستى رۇقساتتار مەن ۆيزالاردى ليتۆا ەلشىلىگى عانا بەرەدى دەگەن. كەيىپكەرىمىزدىڭ ايتۋىنشا، كەلىسىمشارت، ۆيزا سىندى قۇجاتتارعا 500-700 مىڭ تەڭگە تولەگەن. ءبىراق اقشا دا، ۆيزا دا جوق.

ۆەنەرا بيكوشيەۆا، نۇر- سۇلتان قالاسىنىڭ تۇرعىنى:

- ەلشىلىككە بارىپ، قۇجاتىمدى تاپسىردىم. ءبىراق ۆيزامدى قابىلدامادى. بۇل كومپانيادان كەلگەن ادامداردىڭ ۆيزالارىنان باس تارتىپ جاتقانىن ەستىدىم. ونى كومپانيا باسشىلىعىنا ايتقانىمدا، ول كونسۋلعا پارا بەرۋ كەرەك دەپ قايتادان اقشا جيناعىسى كەلدى. سول كەزدە كۇمان تۋدى. قازىرگى تاڭدا ءبىزدىڭ جاعداي مۇشكىل. سەبەبى كرەديت الدىق، كەيبىرەۋى تەمىر تۇلپارىن دا ساتقان. قارىزعا بەلشەمىزدەن باتتىق.

ليتۆا ەلشىلىگىنە حابارلاسىپ، ءمان- جايدى بىلۋگە تىرىستىق. ءبىراق جاۋاپ بەرۋدەن باس تارتتى. ەسەسىنە كومپانيا باسشىسى ايدوس شارىپوۆپەن بايلانىسقا شىقتىق.

ايدوس ءشارىپ، «As Senim Business Group» باسشىسى:

- مەن 80 ادامنىڭ قۇجاتىن عانا راسىمدەۋ قاجەتپىن. باسقالارىنا ەشنارسە قايتارىپ بەرۋگە ءتيىستى ەمەسپىن. زاڭ الدىندا كىناسىزبىن. ازاماتتاردىڭ قولدارىنا قۇجاتتى ۇستاتتىم. ءوز جۇمىسىمدى وراندادىم. ەگەر ەلشىلىك قۇجاتتاردى قابىلداماسا، وندا ءبىزدىڭ كومپانيا وعان جاۋاپتى ەمەس. مۇنىڭ بارلىعى كەلىسىمشارتتا كورسەتىلگەن.

جىل باسىنان بەرى ەلىمىزدە وسىنداي كومپانيالارعا قاتىستى 8 قىلمىستىق ءىس قوزعالدى. تەرگەۋشىلەر الاياقتاردىڭ قۇرىعىنا ىلىكپەس ءۇشىن بارلىق قۇجاتتاردى مۇقيات تەكسەرۋگە كەڭەس بەرەدى.

نۇريدين داۋىلبايەۆ، تەرگەۋ دەپارتامەنتىنىڭ ايماقتىق باقىلاۋ باسقارماسىنىڭ باستىعى:

- جەرگىلىكتى كومپانيالار شەتەلگە جۇمىسقا ورنالاستىرۋ ءۇشىن شارت تۇزگەن كەزدە ازاماتتاردى ەڭبەك ەمەس، قوناق نەمەسە تۋريستىك ۆيزامەن الىپ شىققان. شەتەلدە ولاردى جۇمىسپەن قامتي الماعان. شەتەلگە جۇمىسقا بارۋ ءۇشىن ەڭبەك ۆيزاسىن اشىپ، بارۋعا بولادى. ينتەرنەتتە مۇنداي كومپانيالاردىڭ جارنامالارى ءورىپ ءجۇر. دەلدالدار جۇمىسقا تۇرعىزۋعا كەپىلدىك بەرمەيدى. ولار تەك قۇجاتتاردى راسىمدەۋگە باعىت- باعدار بەرىپ وتىرادى. الاياقتار قىلمىس جاساۋ بارىسىندا جابىرلەنۋشىلەردىڭ قۇقىقتىق ساۋاتسىزدىعىن پايدالانادى دەيدى زاڭگەر.

يليا لۋنيەۆ، زاڭگەر:

- مۇنداي الاياقتاردان ساق بولۋ ءۇشىن قۇجاتسىز ۋادەگە سەنۋگە بولمايدى. ەگەر ازاماتتار شەتەلدە جۇمىس ىستەگىسى كەلسە، وندا بارلىق قۇجاتتاردى وزدەرى ازىرلەۋ قاجەت. ولارعا قوماقتى سومما بەرۋدىڭ قاجەتى جوق. تاقىرعا وتىرعىزىپ كەتەتىنى انىق. ازاماتتار وسىنداي كەلەڭسىز جاعدايعا تاپ بولسا، ولار اقشالارىن كەرى قايتارۋى ەكىتالاي. زاڭ سالاسىنىڭ مامانى، الاياق سوتتالعاننىڭ وزىندە اقشانى قايتارا المايتىنىن ەسكەرتەدى.

يليا لۋنيەۆ، زاڭگەر:

- بۇل جاعدايدا تەك ءبىر ءادىس بار. ول «سەنىم» كومپانياسىنىڭ باسشىسىنا عانا ارىز جازباۋ قاجەت. سونىمەن قاتار مەنەدجەرلەردى دە، باس ەسەپشى، ياعني بۇل ىسكە قاتىسقان بارلىق ازاماتتى جاۋاپقا تارتۋ قاجەت. سول كەزدە عانا قارجىنى قايتارۋعا مۇمكىندىك بار. قازىرگى ۋاقىتتا اتالعان قىلمىستىق ءىس بويىنشا تەرگەۋ امالدارى جۇرگىزىلۋدە. زاڭ ۇستەمدىگى قوعامنىڭ دامۋى مەن گۇلدەنۋىنە تىكەلەي جاعداي جاسايدى. دەگەنمەن كەيدە زاڭنىڭ دا قاۋقارسىز كەزدەرى بولادى. مۇندايدا ءار ادامعا زاڭ تۇرعىسىنان ساۋاتتىلىق قاجەت- اق.


سوڭعى جاڭالىقتار