قوستاناي وبلىسىندا 400 شاقىرىم اۆتوجول اقىلى بولادى

قوستاناي. قازاقپارات - 2020-جىلدان باستاپ قوستاناي وبلىسى اۋماعىنداعى 400 شاقىرىم جولعا اقى الىنادى. بۇل تۋرالى اگەنتتىك تىلشىسىنە «قازاۆتوجول» ا ق وبلىستىق فيليالىنىڭ ديرەكتورى اندرەي گورۆات ايتىپ بەردى.

«بۇگىندە ەلىمىزدە 11 مىڭ شاقىرىم جولدى اقىلى ەتۋ ماسەلەسى پىسىقتالۋدا. بۇل ءبىزدىڭ وبلىسىمىز ارقىلى وتەتىن «باتىس ەۋروپا-باتىس قىتاي» حالىقارالىق ترانزيتتىك دالىزىنە تىكەلەي قاتىستى. قازىر جوبالاۋ-سمەتالىق قۇجاتتاما ازىرلەنۋدە. كەلەسى جىلدىڭ باسىنان وبلىستاعى 400 شاقىرىم اۆتوجول اقىلى بولادى دەپ جوسپارلانۋدا. سول ءۇشىن 9 مەردىگەر جول جوندەۋ جۇمىستارىن تولىعىمەن اياقتاۋى ءتيىس»، - دەدى ا. گورۆات.

كەلەر جىلى قوستاناي جولدارىن اۋقىمدى جۇمىستار كۇتىپ تۇر. وبلىستىق جانە اۋداندىق ماڭىزى بار جولدارعا جوندەۋ جۇرگىزىلەدى. 606 شاقىرىم جول جوندەلمەك، 36 ۋچاسكەنى قامتيتىن جوبانىڭ جالپى قۇنى - 20 ميلليارد تەڭگە. جوندەلگەن جولدىڭ ساپاسىن تەكسەرۋ ءۇشىن ارنايى كوميسسيا قۇرىلدى.

ال وبلىس ورتالىعىنىڭ جولدارىن جوندەۋ بويىنشا بيىل 4 ميلليارد تەڭگە يگەرىلگەن.