قازاقستاندىقتاردىڭ ورتاشا وتباسىلىق تابىسى 400 مىڭ تەڭگەدەن اسادى

None
None
نۇر-سۇلتان. قازاقپارات - قازاقستاندىقتاردىڭ ورتاشا وتباسىلىق تابىسى 421,5 مىڭ تەڭگەگە جەتتى. بۇل تۋرالى قازاقپارات Finprom.kz سىلتەمە جاساپ حابارلايدى.

«2019-جىلعى ەكىنشى توقساننىڭ قورىتىندىسى بويىنشا، ءۇي شارۋاشىلىقتارىنىڭ اقشالاي تابىسى 579 مىڭ تەڭگەنى قۇراپ، وتكەن جىلدىڭ سايكەس كەزەڭىمەن سالىستىرعاندا %10,7 عا ارتتى. وتباسىلىق كىرىستەر ءوسۋىنىڭ نەگىزگى كوزى ەڭبەك قىزمەتىنەن تۇسەتىن تابىستاردىڭ ورتاشا ەسەپپەن 7,6 پايىزعا ارتۋىمەن بايلانىستى. ەكىنشى توقسان سوڭىنداعى دەرەكتەر بويىنشا ءاربىر وتباسى ەڭبەك قىزمەتىمەن ورتا ەسەپپەن 421,5 مىڭ تەڭگە تابادى»، - دەپ جازادى Finprom.kz.

سايتتىڭ جازۋىنا قاراعاندا، ءۇي ءىشى تابىسىنىڭ ەڭ ۇلكەن سوماسى ماڭعىستاۋ وبلىسىندا تىركەلگەن (852,2 مىڭ تەڭگە). وتباسىلارى ورتا ەسەپپەن 741,2 مىڭ تەڭگە تاباتىن نۇر-سۇلتان قالاسى ەكىنشى ورىندا تۇرسا، 673,2 مىڭ تەڭگەلىك كورسەتكىشپەن قىزىلوردا وبلىسى ۇزدىك ۇشتىكتى تۇيىندەپ تۇر.

ەلدىڭ 7 وڭىرىندە وتباسىلىق تابىس مولشەرى 421,5 مىڭ تەڭگە كولەمىندەگى رەسپۋبليكالىق ورتاشا كورسەتكىشتەن جوعارى بولعان.

Finprom.kz. مالىمەتى بويىنشا، قازاقستاندىق وتباسىلاردىڭ شىعىنى تابىسىنان اسىپ تۇسكەن. ەكىنشى توقسان قورىتىندىسى بويىنشا، ءبىر وتباسىنىڭ وراتاشا شىعىنى 543,3 مىڭ تەڭگە بولىپ وتىر.

شىعىن كولەمى بويىنشا الماتى قالاسى (680,8 مىڭ تەڭگە)، اتىراۋ (638,8 مىڭ تەڭگە) جانە قاراعاندى وبلىستارى (630,8 مىڭ تەڭگە) العاشقى ۇشتىكتە تۇر. وڭىرلەر اراسىندا بارىنەن دە پاۆلودار وبلىسىنداعى وتباسىلاردىڭ شىعىنى قاتتى ارتقان (15,8 پايىز).

«بۇل شىعىنداردىڭ 62,7 پايىزى تۇتىنۋ شىعىندارىمەن بايلانىستى. ەكىنشى توقساندا ورتاشا وتباسىلىق شىعىن 543,3 مىڭ تەڭگە دەپ ەسەپتەگەندە، ونىڭ 504 مىڭ تەڭگەسى تۇتىنۋ شىعىندارىنا، 24,9 مىڭ تەڭگەسى نەسيە مەن قارىزداردى جابۋعا، 13,8 مىڭ تەڭگەسى اليمەنت تولەۋ سياقتى تۋىسقاندىق كومەككە، 693 تەڭگەسى سالىق وتەۋگە جۇمسالعان»، - دەلىنگەن مالىمەتتە.

سوڭعى جاڭالىقتار