الەمدەگى ەڭ ۇلكەن ۇشاق 400 ميلليون دوللارعا ساتۋعا قويىلدى

None
None
نۇر-سۇلتان. قازاقپارات - الەمدەگى ەڭ ۇلكەن اۋە كەمەسى اتانعان Stratolaunch ەكسپەريمەنتتىك كاتاماران ۇشاعىن 400 ميلليون دوللارعا ساتۋ جوسپارلانىپ وتىر، دەپ حابارلايدى CNBC تەلەارناسى دەرەككوزگە سىلتەمە جاساپ.

Stratolaunch وربيتاعا زىمىراندى ۇشىرۋعا ارنالعان. تەلەارنانىڭ مالىمەتتەرىنە قاراعاندا، باعاعا ۇشاققا يە بولۋمەن قاتار، زياتكەرلىك مەنشىك جانە جوباعا بايلانىستى ينفراقۇرىلىم دا كىرەدى. ەسكە سالا كەتسەك، ساۋىردە Stratolaunch ا ق ش-تىڭ وڭتۇستىك باتىسىنداعى موحاۆە ءشولىنىڭ ۇستىمەن ۇشىپ وتكەن ەدى. سىناق كەزىندە اۋە كەمەسى 5 شاقىرىمنان جوعارى بيىكتىككە كوتەرىلىپ، ساعاتىنا 304 شاقىرىم جىلدامدىقتى باعىندىردى.

Stratolaunch اۋە كەمەسىن جابدىقتاۋ 2017 -جىلى اياقتالدى. ونىڭ قانات قۇلاشى 117,3 مەتر. بۇل ۇشاق قۇرىلىسىنداعى ءابسوليۋتتى رەكورد. ال سالماعى 226,8 توننا. وعان Boeing 747-نىڭ التى قوزعالتقىشى جانە 28 دوڭعالاعى ورناتىلعان.

سوڭعى جاڭالىقتار