جارتى جىلدىڭ ىشىندە ادۆوكاتتار سانى 400 گە ارتقان
«وتكەن جىلى مينيسترلىك زاڭ قىزمەتى سالاسىندا رەفورما جۇرگىزدى. اتالعان رەفورما اياسىندا قابىلدانعان شارالار زاڭ قاۋىمداستىعىندا باسەكەلەس ورتانى قۇرۋعا جانە ادۆوكاتتار سانىن كوبەيتۋگە مۇمكىندىك بەرىپ وتىر. ەسەپتەي بەرىڭىز: سوڭعى 4 جىلدا ادۆوكاتتار سانى 300 گە عانا ارتسا، زاڭ قابىلدانعان ۋاقىتتان بەرگى جارتى جىلدا ولاردىڭ سانى 400 گە كوبەيىپ، 5 مىڭنان اسا ادامدى قۇرادى»، - دەدى ادىلەت ءمينيسترى مارات بەكەتايەۆ ەلوردادا حالىقپەن ەسەپ بەرۋ كەزدەسۋىندە.
ءمينيستردىڭ ايتۋىنشا، زاڭ شەڭبەرىندە ماماندىقتى يگەرۋدە كەدەرگى بولعان ادۆوكاتتار القاسىنا كىرۋ جارناسى مەن ادۆوكاتتاردىڭ القا باسشىلىعىنا نەگىزسىز تاۋەلدىلىك تۋدىرعان ادۆوكاتتىق وردەرلەر الىنىپ تاستالعان. زاڭمەن تارتىپتىك ءىس-جۇرگىزۋدى 2 دەڭگەيلى جۇيەدە قاراستىرۋ ايقىندالىپ، جەرگىلىكتى جانە رەسپۋبليكالىق دەڭگەيدە قۇرامى 6 ادۆوكات، 3 قوعام وكىلى جانە 2 وتستاۆكاداعى سۋديادان تۇراتىن تارتىپتىك كوميسسيالار قۇرىلعان.
«ادۆوكاتتار القاسى قىزمەتىن ۇيىمداستىرۋدا دا وزگەرىستەر بار. القا قىزمەتىنىڭ اشىقتىعىن قامتاماسىز ەتۋ ماقساتىندا ينتەرنەت- رەسۋرستا قارجى- شارۋاشىلىق قىزمەت تۋرالى ەسەپتى ورنالاستىرادى. ادۆوكاتتىق قاۋىمداستىقتى ءتيىمدى باسقارۋ ءۇشىن ءبىر تۇلعانىڭ باسقارۋ ورگاندارىندا ءبىر مەرزىمنەن كوپ بولۋىنا تىيىم سالىندى»، - دەدى ول.
مارات بەكەتايەۆ بۇدان باسقا، زاڭ كومەگىنىڭ ساپاسىن ارتتىرۋ شارالارى قابىلدانعانىن اتاپ ءوتتى.
«ادۆوكاتتاردىڭ ءوز بىلىكتىلىگىن ارتتىرۋ جانە كاسىبي ۇيىم بەكىتكەن ەرەجە مەن ستاندارتتار بويىنشا زاڭ كومەگىن كورسەتۋ مىندەتتىلىگى ەنگىزىلدى. 2020 -جىلعى 1 -قاڭتاردان باستاپ ادۆوكات پەن زاڭ كونسۋلتانتىنىڭ كاسىبي جاۋاپتىلىعىن مىندەتتى ساقتاندىرۋ ينستيتۋتى ەنگىزىلەدى. بۇدان بىلاي ساپاسىز كومەك كورسەتىلگەن جاعدايدا ازاماتتار ساقتاندىرۋ وتەماقىسىن الا الادى. وسى جىلدىڭ 1 -قاڭتارىنان باستاپ الەۋمەتتىك جانە قارجىلىق جاعدايى قيىن ازاماتتار ادۆوكات نەمەسە زاڭ كونسۋلتانتىنان تەگىن كەشەندى الەۋمەتتىك زاڭ كومەگىن الۋدا. بۇل كومەك ءوتىنىش جاساعان ۋاقىتتان باستاپ ءىس بويىنشا شەشىم قابىلدانعانعا دەيىن كورسەتىلەدى»، - دەدى مارات بەكەتايەۆ.