قوستاناي وبلىسى استاناداعى جارمەڭكەگە 400 توننا ءونىم اكەلەدى
بۇل جونىندە وبلىستىق اكىمدىكتە وتكەن كەڭەس بارىسىندا قوستاناي وبلىسى اكىمىنىڭ ورىنباسارى عاۋەز نۇرمۇحامبەتوۆ ايتتى، دەپ حابارلايدى قازاقپارات ءتىلشىسى.
«استانانىڭ 20 جىلدىعى اياسىندا بيىل 1-2 - قىركۇيەك ارالىعىندا ەلوردادا قوستاناي وبلىسىنىڭ اۋىلشارۋاشىلىق كاسىپورىندارىنىڭ قاتىسۋىمەن اۋىلشارۋاشىلىق جارمەڭكەسى وتەدى. وبلىستىڭ 14 اۋدانى مەن 3 قالاسىنىڭ كاسىپورىندارى 400 توننا ءونىمدى وتكىزۋدى جوسپارلاپ وتىر»، - دەدى گ. نۇرمۇحامبەتوۆ.
قوستاناي وبلىسىندا جىل باسىنان بەرى 165 جارمەڭكە ۇيىمداستىرىلعان. ولاردا جالپى 998 ميلليون تەڭگە كولەمىندە 2205 توننا ءونىم ۇسىنىلعان.
ع. نۇرمۇحامبەتوۆ كەي وڭىرلەردە اۋىلشارۋشىلىق جارمەڭكەلەرى از وتەتىنىن ايتىپ، وسى ورايدا جۇمىستى كۇشەيتۋگە تاپسىرما بەردى. وبلىس اكىمىنىڭ ءبىرىنشى ورىنباسارىنىڭ ايتۋىنشا، وبلىستىق جانە ءبىرقاتار وڭىرلەردەگى اۋىلشارۋاشىلىق جارمەڭكەلەرى كۇزدە قايتادان وتكىزىلەتىن بولادى.