اقتوبەدە كوروناۆيرۋس جۇقتىرعان 400 گە جۋىق مەديتسينا قىزمەتكەرلەرى 2 ميلليون تەڭگەدەن الدى
وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا از قامتىلعان وتباسىلاردى قولداۋ جايى ايتىلدى، دەپ حابارلايدى قازاقپارات ءتىلشىسى.
بيىل ىندەت كەزىندە جۇمىسسىز، از قامتىلعان وتباسىلار مەن ءالجۋاز توپتارعا مەملەكەت تاراپىنان ءبىرقاتار شارا قولعا الىندى.
«توتەنشە جاعداي كەزىندە اتاۋلى الەۋمەتتىك كومەك الاتىن وتباسىنىڭ 6-18 جاس ارالىعىنداعى بالالارىنا 5 اي بويى قارجىلاي كومەك بەرىلدى. 5647 تەڭگە بارلىعى 8300 بالاعا بەرىلدى. بيۋجەتتەن 47 ميلليون تەڭگە اۋدارىلدى. سونىمەن بىرگە الەۋمەتتىك كومەك الاتىن 7 توپ بەكىتىلگەن ەدى. ولارعا 948 ميلليون تەڭگە كولەمىندە قارجى اۋدارىلدى. اسىرەسە I ، II ، Ⅲ توپ مۇگەدەكتەرى، 16 جاسقا دەيىنگى مۇگەدەك بالالار مەن ولاردى تاربيەلەپ وتىرعاندار قامتىلدى.
پاندەميا كەزىندە حالىقتى ماتەريالدىق قولداۋ ماقساتىندا وبلىستىق بيۋجەتتەن ارنايى قارجى اۋدارىلدى. 38 مىڭ ادامعا 20 مىڭ تەڭگەدەن بەرىلدى. بۇل 774 ميلليون تەڭگەنى قۇرادى»، - دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى بۇلبۇل ەلەۋسىنوۆا.
سونىمەن بىرگە اقتوبەدە «ءبىز بىرگەمىز» رەسپۋبليكالىق اكسياسى اياسىندا 34 مىڭنان استام ادامعا 1,7 ميلليارد تەڭگە قارجى جۇمسالدى. از قامتىلعان، كوپبالالى وتباسىلار، مۇگەدەكتەر مەن 100 جاستان اسقان قالا تۇرعىندارىنا قولداۋ كورسەتىلدى.
«الەۋمەتتىك كومەكتىڭ ءبارى توتەنشە جاعداي كەزىندە عانا بەرىلدى. كارانتين كۇشەيسە، جەرگىلىكتى جانە اتقارۋشى ورگاندار تاراپىنان ناقتى شەشىم قابىلدانادى»، - دەدى بۇلبۇل ەلەۋسىنوۆا.
ال «مەملەكەتتىك الەۋمەتتىك ساقتاندىرۋ» ا ق وبلىستىق فيليالىنىڭ ديرەكتورى وتەگەن ۇركىمبايەۆتىڭ ايتۋىنشا، بيىل 29 مىڭنان استام ادامعا 4,7 ميلليارد تەڭگە الەۋمەتتىك تولەم بەرىلدى.
«شاعىن جانە ورتا بيزنەستى، ءىرى كاسىپكەرلىك سۋبەكتىلەرىن قولداۋ ماقساتىندا ءبىرقاتار جۇمىس اتقارىلدى. ماسەلەن وبلىستا 200 مىڭنان استام ادامعا 24,4 ميلليارد تەڭگە ءبولىنىپ، ولارعا 42500 تەڭگەدەن اۋدارىلدى. COVID-19-عا قارسى كۇرەسكە جۇمىلدىرىلعان مەديتسينا قىزمەتكەرلەرى دە نازاردان تىس قالمادى. جۇمىستا ءجۇرىپ كوروناۆيرۋس ينفەكتسياسىن جۇقتىرعاندارعا - 2 ميلليون، ال كوز جۇمعاندارعا - 10 ميلليون تەڭگە ءبولۋ قاراستىرىلعان. ۆيرۋستى جۇقتىرعان 387 مەديتسينا قىزمەتكەرى مەن كوز جۇمعان 9 مەديتسينا قىزمەتكەرىنىڭ وتباسىنا ءبىر رەتتىك تولەم اۋدارىلدى»، - دەدى وتەگەن ۇركىمبايەۆ.