كارانتينگە تارتىلعان قىزمەتكەرلەرگە قوسىمشا اقى تولەۋ ءۇشىن 40,5 ميلليارد تەڭگە بولىنەدى
بۇل تۋرالى ۇكىمەت وتىرىسىندا ق ر پرەمەر-ءمينيسترىنىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ايتتى.
«قازىرگى ۋاقىتتا الەم ەكونوميكالىق دامۋدىڭ باياۋلاۋى جانە كوروناۆيرۋستىق ينفەكتسيانىڭ تارالۋى سياقتى ەكى عالامدىق قاۋىپ-قاتەرمەن بەتپە-بەت كەلىپ وتىر. بۇل ءبىر-بىرىمەن بايلانىستى فاكتورلار بيزنەسكە، حالىققا جانە ءبىزدىڭ ەكونوميكامىزعا سوققى بولدى. سىزدەردىڭ قاراۋلارىڭىزعا ۇسىنىلعان «2020-جىلعا ارنالعان رەسپۋبليكالىق بيۋجەتتى ناقتىلاۋ تۋرالى» ق ر پرەزيدەنتى جارلىعىنىڭ جوباسى وسىنداي قيىن جاعدايدا ەكونوميكانى، شاعىن جانە ورتا بيزنەستى، حالىقتى قولداۋعا جانە بيۋجەتتىڭ تەڭگەرىمدىلىگىن قامتاماسىز ەتۋگە باعىتتالعان. رەسپۋبليكالىق بيۋجەتتىڭ كىرىستەرى 6,4 تريلليون تەڭگە كولەمىندە باعالانۋدا. سىرتقى جاعىمسىز فاكتورلاردىڭ اسەرىنەن قوسىلعان قۇن سالىعى، شيكى مۇنايعا ەكسپورتتىق كەدەن باجى، تابيعي رەسۋرستاردى پايدالانعانى ءۇشىن تۇسەتىن تۇسىمدەردىڭ تومەندەۋى كۇتىلۋدە»، - دەدى ول.
وسى رەتتە ءبىرىنشى ۆيتسە-پرەمەر توتەنشە جاعداي كەزىندە حالىقتى جانە ەكونوميكانى قولداۋعا بىرنەشە باعىت بويىنشا قوسىمشا شىعىستار كوزدەلەتىندىگىن ايتتى.
«ەكونوميكالىق تۇراقتىلىقتى جانە توتەنشە جاعداي رەجيمىن قامتاماسىز ەتۋگە ءبىراتار شارالار قاراستىرىلىپ وتىر. جۇمىسپەن قامتۋدىڭ جول كارتاسىن ىسكە اسىرۋعا 1 تريلليون تەڭگە باعىتتالاتىن بولادى. ينفراقۇرىلىمدىق جوبالار ىسكە اسىرىلادى جانە 250 مىڭ جۇمىس ورنى اشىلادى. «بيزنەستىڭ جول كارتاسىن» ىسكە اسىرۋعا قوسىمشا 84,5 ميلليارد تەڭگە باعىتتاۋ جوسپارلانىپ وتىر. باعدارلامادا كاسىپكەرلەردىڭ كرەديتتەرى بويىنشا سۋبسيديالاۋ جانە كەپىلدەندىرۋ ارقىلى كاسىپكەرلىكتى قولداۋ شارالارىن كۇشەيتۋ كوزدەلىپ وتىر. بۇل شامامەن 16 مىڭ جۇمىس ورنىن اشۋعا جانە 250 ميلليارد تەڭگەدەن استام سالىقتىڭ تۇسۋىنە مۇمكىندىك بەرەدى»، - دەدى ءاليحان سمايىلوۆ.
سونداي-اق، ونىڭ دەرەگىنشە، ازاماتتاردىڭ جەكەلەگەن ساناتتارى ءۇشىن ازىق-تۇلىك-تۇرمىستىق جيىنتىق بەرۋگە 30,8 ميلليارد تەڭگە كوزدەلەدى. وسى شارالار جالپى 2 ميلليون استام ادامدى قامتيتىن بولادى. «ناقتىلاۋ اياسىندا «ەڭبەك» باعدارلاماسىن ىسكە اسىرۋعا 50 ميلليارد تەڭگە قوسىمشا شىعىستار كوزدەلەدى. ناتيجەسىندە جاپپاي كاسىپكەرلىكتى دامىتۋ، الەۋمەتتىك تۇرعىدان وسال حالىقتى قولداۋ، ەڭبەك دەلدالدىعى مەن شەبەرلىكتىڭ ءتيىمدى مودەلىن جاساۋ جۇمىستارى جالعاستىرىلادى. كوروناۆيرۋستىق ينفەكتسيانىڭ تارالۋى بويىنشا اعىمداعى جاعدايدى ەسكەرە وتىرىپ، مەملەكەت باسشىسى كارانتينگە تارتىلعان مەديتسينالىق جانە باسقا دا قىزمەتكەرلەرگە قوسىمشا اقى تولەۋدى جۇزەگە اسىرۋدى تاپسىردى. اتالعان ماقساتتارعا 40,5 ميلليارد تەڭگە ءبولۋ كوزدەلىپ وتىر»، - دەدى قارجى ءمينيسترى.