16:09, 17 - قىركۇيەك 2019 | GMT +6
ق ر پرەزيدەنتى اقمولا وبلىسىندا 4,8 مىڭ سپورتشىنى دايىنداعان مەكتەپكە باردى
جاقسى اۋدانى. قازاقپارات – ق ر پرەزيدەنتى قاسىم- جومارت توقايەۆ اقمولا وبلىسىنىڭ جاقسى اۋدانىنداعى ت. ۋاليەۆ اتىنداعى سپورت مەكتەبىنە باردى، دەپ حابارلايدى قازاقپارات اقورداعا سىلتەمە جاساپ.
مەملەكەت باسشىسى اقمولا وبلىسىنا جاساعان جۇمىس ساپارى اياسىندا جاقسى اۋدانىنداعى جەكە سپورت مەكتەبىن ارالاپ كوردى.
قازاقستان پرەزيدەنتىنە كۇرەس، بوكس جانە فۋتبول سپورتىنا ارنالعان زالدار كورسەتىلدى. قازىرگى ۋاقىتتا جاقسى اۋدانىنىڭ 170 وقۋشىسى بوكس، گرەك- ريم كۇرەسى جانە فۋتبول سەكسيالارىندا سپورتپەن شۇعىلدانادى.
بۇل سپورت مەكتەبى ءوز تاريحىندا 4800 سپورتشىنى، سونىڭ ىشىندە قازاقستان رەسپۋبليكاسىنىڭ ەڭبەك سىڭىرگەن سپورت شەبەرلەرى مەن حالىقارالىق دارەجەدەگى سپورت شەبەرلەرىن دايىنداپ شىعاردى.
مەملەكەت باسشىسى گرەك- ريم كۇرەسىنەن وليمپيادا چەمپيونى يۋريي مەلنيچەنكومەن جانە سپورت مەكتەبىنىڭ تاربيەلەنۋشىلەرىمەن اڭگىمەلەسۋ بارىسىندا اۋىلداعى بۇقارالىق سپورتتى دامىتۋدىڭ ماڭىزدىلىعىن اتاپ ءوتتى.