قىتايدىڭ قاشقار وكرۋگىنىڭ 4,7 ميلليون تۇرعىنى كوروناۆيرۋس تەستىلەۋىنەن وتەدى

بەيجىڭ. قازاقپارات - شىڭجاڭ ۇيعىر اۆتونوميالىق ايماعىنىڭ (ش ۇ ا ا) قاشقار وكرۋگىنىڭ بارلىق حالقى كوروناۆيرۋستىڭ بار-جوعىن انىقتايتىن تەستىلەۋدەن وتەدى، دەپ حابارلايدى قازاقپارات ءتىلشىسى دەنساۋلىق ساقتاۋ ىستەرى جونىندەگى جەرگىلىكتى كوميتەتتىڭ مالىمدەمەسىنە سىلتەمە جاساپ.

جەكسەنبى كۇنى ش ۇ ا ا قاشقار وكرۋگىنىڭ 2,8 ميلليوننان استام تۇرعىنى كوروناۆيرۋس تەستىلەۋىنەن ءوتتى. 137 سيمپتومسىز اۋرۋ تاسىمالداۋشى انىقتالدى. بارلىعى 4,7 ميلليون ادام تەستىلەۋدەن ءوتۋى ءتيىس، ونى جەرگىلىكتى بيلىك وسى سەيسەنبىدە اياقتاۋدى جوسپارلاپ وتىر.

وتكەن سەنبىدە ش ۇ ا ا بيلىگى قاشعار وكرۋگىندە جەرگىلىكتى تۇرعىندار اراسىندا سيمپتومسىز جۇقتىرۋدىڭ ءبىر وقيعاسى انىقتالعاننان كەيىن قالىپتاسقان ەپيدەميولوگيالىق جاعدايعا شۇعىل دەن قويۋ رەجيمىن ەنگىزدى.

سونىمەن، جوسپارلى تەكسەرۋ بارىسىندا 17 جاستاعى قىزدىڭ كوروناۆيرۋسقا تەستى وڭ ناتيجە كورسەتتى. قىز جەرگىلىكتى توقىما كاسىپورنىندا جۇمىس ىستەيدى جانە سوڭعى جىلى ايماقتان تىس جەرلەرگە شىقپاعان. تىگىن فابريكاسىنىڭ باسقا 831 قىزمەتكەرىنىڭ تەستتەرى وڭ ناتيجە كورسەتپەدى، الايدا قىزدىڭ تانىستارى مەن ونىڭ اتا-انالارىن، سونداي-اق ولارمەن بايلانىستا بولعان ادامداردى تەكسەرۋ بارىسىندا اۋرۋدىڭ تاعى 137 سيمپتومسىز تاسىمالداۋشىسى انىقتالدى.

ش ۇ ا ا قاشقار وكرۋگىندە قوعامدىق دەنساۋلىق سالاسىنداعى كۇردەلى توتەنشە جاعدايلارعا دەن قويۋدىڭ ءبىرىنشى دەڭگەيى ەنگىزىلدى.

ەسكە سالا كەتەيىك، شىلدە ايىنىڭ ورتاسىندا ش ۇ ا ا اكىمشىلىك ورتالىعى ءۇرىمجى قالاسى كوروناۆيرۋستىڭ وشاعىنا اينالعان ەدى، سودان كەيىن جەرگىلىكتى بيلىك 40 كۇنگە سوزىلعان لوكداۋن ەنگىزدى.