قازاق قىزى 4 ۋنيۆەرسيتەتتە وقيدى، 6 ءتىل بىلەدى جانە ب ۇ ۇ-دا جۇمىس ىستەيدى

استانا. قازاقپارات – اياۋلىم سارىبايەۆا ب ۇ ۇ شتاب-پاتەرىندە جۇمىس ىستەيدى، Christian Dior ءسان ءۇيىنىڭ ارنايى باعدارلاماسى بويىنشا ءبىلىمىن جەتىلدىرەدى، ساياحاتتايدى جانە ەۋروپانىڭ جەتەكشى ۋنيۆەرسيتەتتەرىندە وقيدى.

بۇل تۋرالى Tengri Life جازدى.

23 جاستاعى قازاق قىزى الەمنىڭ 30-دان استام ەلىنە بارعان. التى ءتىل بىلەدى. اياۋلىم بەدەلدى Erasmus Mundus باعدارلاماسىنىڭ ستيپەندياتى. بۇل ستيپەنديا وعان ءار سەمەستردە ەۋروپاداعى ۋنيۆەرسيتەتتەردە وقۋعا مۇمكىندىك بەرەدى.

«وسى باعدارلامانىڭ ارقاسىندا مەن ءتورت ۋنيۆەرسيتەتتە ءبىلىم الدىم: شوتلاندياداعى گلازگو ۋنيۆەرسيتەتىندە، يسپانياداعى مادريد اۆتونوميالىق ۋنيۆەرسيتەتىندە، فرانسياداعى ەكس-مارسەل ۋنيۆەرسيتەتىندە جانە پورتۋگالياداعى ليسسابون ۋنيۆەرسيتەتىندە»، - دەيدى ول.

اياۋلىمنىڭ ايتۋىنشا، العاش رەت Erasmus+ باعدارلاماسى بويىنشا يسپانياعا 17 جاسىندا كەتكەن. يسپان ءتىلىن دە بىلمەگەن. ول جەردە 6 اي تۇرعاننان كەيىن جەرگىلىكتى تىلدە سويلەي باستاعان، ونىڭ ۇستىنە، باسقا تىلدەردى دە ۇيرەنگىسى كەلگەن.

«اينالاداعىنىڭ ءبارى مەنى ءارتۇرلى مادەنيەتتەردى ۇيرەنۋگە يتەرمەلەدى. التى ايدا يسپان ءتىلىن ۇيرەندىم، ۇيگە ورالعاننان كەيىن دە وقۋدى جالعاستىردىم. سودان كەيىن فرانسۋز جانە پورتۋگال تىلدەرىن ۇيرەنە باستادىم. ال قازىر 6 تىلدە سويلەيمىن. مەن 3 رەت Erasmus+ باعدارلاماسىنا قاتىستىم. سوندىقتان ءۇشىنشى كۋرستان كەيىن ا ق ش-تان ورالماي تۇرىپ، بىردەن فرانسۋز ۋنيۆەرسيتەتىنە وقۋعا شاقىرتۋ الدىم»، - دەيدى ول.

سونداي-اق، ول Christian Dior Couture ۇسىنعان Dior جانە UNESCO تالىمگەرلىك باعدارلاماسىنىڭ مۇشەسى. باعدارلاما الەمنىڭ تۇكپىر- تۇكپىرىنەن مىڭداعان جاس قىزدارعا قولداۋ كورسەتىپ، ولاردىڭ مانساپتىق جانە كوشباسشىلىق دەڭگەيىن كوتەرۋگە كومەكتەسەدى.

اياۋلىم - يۋنەسكو-نىڭ بۇكىل شتاب-پاتەرىندە قازاقستاننان كەلگەن جالعىز ستاجەر. ول الەۋمەتتىك جانە گۋمانيتارلىق عىلىمدار سەكتورىندا جۇمىس ىستەيدى. الەۋمەتتىك جەلىلەردە كونتەنت جاسايدى، پرەسس-رەليزدەردى اۋدارادى جانە دايىندايدى.

«مەنىڭ شەت تىلدەرىن ءبىلۋىم كوپ كومەكتەستى دەپ ويلايمىن. ولار يسپان، فرانسۋز جانە اعىلشىن تىلدەرىن جەتىك بىلەتىن ادامدى ىزدەدى. مەنىڭ الەمنىڭ ءارتۇرلى ەلدەرىندە تۇرۋ جانە وقۋ تاجىريبەم ماڭىزدى ءرول اتقاردى»، - دەيدى ول.

بويجەتكەن ءالى دە ۇلىبريتانيادا ماگيستراتۋرادا ءبىلىم الۋدا، ال وقۋىن اياقتاعان سوڭ حالىقارالىق ۇيىمداردا جۇمىس ىستەۋدى جوسپارلاپ وتىر.

«العان ءبىلىم مەن داعدىلارىمدى دامىتۋ ءۇشىن حالىقارالىق ۇيىمداردا جۇمىس ىستەۋدى جوسپارلاپ وتىرمىن. قوعامعا ۇلەس قوسقىم كەلەدى. مەن دە ءوز بلوگىمدى جۇرگىزەمىن جانە بۇل ءىسىم جاستارعا ۇلگى بولۋدىڭ ءبىر جولى دەپ ويلايمىن»، - دەيدى اياۋلىم.

اقپارات دەرەككوزى: massaget.kz