كاسىپكەرلەرگە 4-6 پايىزبەن نەسيە بەرىلۋدە- اۋىل شارۋاشىلىعىن قولداۋ قورى
بيىلدىڭ وزىندە مىڭنان استام كاسىپكەر نەسيە الىپ ۇلگەردى. بۇل تۋرالى قازاقپارات ا ش م سىلتەمە جاساپ حابارلايدى.
س ق و قىزىلجار اۋدانىنىڭ بەسكول اۋىلىندا تۇراتىن تىگىن سەحى بار جەكە كاسىپكەر باقىت سەيىلوۆا كيىم قىسقارتۋدان باستاپ مەكتەپ فورماسىنا دەيىن تىگەدى. 2010 -جىلدان بەرى «جۇمىسپەن قامتۋدىڭ جول كارتاسى - 2020» جانە «ەڭبەك» مەملەكەتتىك باعدارلامالار ارقىلى قوردان ءتورت رەت نەسيە الىپ، بيزنەسىن كەڭەيتكەن. قازىرگى ۋاقىتتا 6 ادامعا جۇمىس بەرىپ وتىر.
«قازىر ەڭبەك ەتەمىن دەگەن ادامعا مەملەكەت قولداۋ كورسەتەدى. ونى تەك ءتيىمدى پايدالانۋ كەرەك. مەن وسى كاسىپپەن اينالىسقالى اۋىل شارۋاشىلىعىن قارجىلاي قولداۋ قورىنان ءتورت رەت نەسيە الدىم. سونىڭ ارقاسىندا تىگىن تسەحىمدى كەڭەيتتىم، اينالىم كاپيتالىمدى تولىقتىردىم. جۇمىسىم ويداعىداي ءجۇرىپ جاتىر» ، - دەيدى كاسىپكەر باقىت سەيىلوۆا.
وسى اۋىلدا تۇراتىن جەكە كاسىپكەر كەڭەس كۋكييەۆ جىلقى شارۋاشىلىعىمەن اينالىسادى. ول دا 2014 جانە 2019 -جىلدارى «جۇمىسپەن قامتۋدىڭ جول كارتاسى - 2020» جانە «ەڭبەك» مەملەكەتتىك باعدارلاماسى اياسىندا اۋىل شارۋاشىلىعىن قارجىلاي قولداۋ قورىنىڭ سقو فيليالىنان ەكى رەت نەسيە الىپ، شارۋاشىلىعىن ودان ءارى دامىتقان. بۇگىنگى تاڭدا وتىز بيە ساۋىپ وتىرعان كاسىپكەر قىمىز دايىنداپ ساتادى. شارۋاشىلىقتا 3 ادام تۇراقتى جۇمىسپەن قامتىلعان.
«اۋىلدا تۇرعان سوڭ مالدىڭ يگىلىگىن كورۋ كەرەك دەپ ەسەپتەيمىن. وڭاي ولجا جوق. ءبارى ەڭبەكپەن كەلەدى. جىلقى باعۋدىڭ دا وزىندىك قيىندىقتارى بار. ۇقساتا بىلسەڭ، سوعان وراي تابىسىن دا كورۋگە بولادى. اۋىل شارۋاشىلىعىن قارجىلاي قولداۋ قورىنان ەكى رەت نەسيە الىپ، جىلقى باسىن كوبەيتتىم، ساۋىن بيەلەرىمنىڭ سانىن ارتتىردىم. قىمىز اشىتىپ ساتامىز. تابىسىمىز جاقسى. ءۇش ادامعا جۇمىس بەرىپ وتىرمىن» ، - دەيدى كەڭەس كۋكيەۆ.
سولتۇستىك قازاقستان وبلىسى مال شارۋاشىلىعىنا قولايلى ايماق. جەرى كەڭ، ءشوبى شۇيگىن، سۋى ءمولدىر. سوندىقتان بولار، قوردان نەسيە الۋشىلاردىڭ باسىم كوپشىلىگى مال شارۋاشىلىعىمەن اينالىسادى. سونىڭ ىشىندە جىلقى ءوسىرۋدى قولعا العان شارۋالار كوپ.
«بيىل ءبىزدىڭ فيليالعا «ەڭبەك» باعدارلاماسى بويىنشا 2,28 ميلليارد تەڭگە قارجى بولىنگەن بولاتىن. بۇگىنگى تاڭدا ونىڭ 1 ميلليارد تەڭگەدەن استامى يگەرىلىپ، 286 جوبا قارجىلاندىرىلدى. جالپى، بيىل جىل سوڭىنا دەيىن 529 كاسىپكەرگە نەسيە بەرۋدى جوسپارلاپ وتىرمىز» ، - دەيدى «اۋىل شارۋاشىلىعىن قارجىلاي قولداۋ قورى» ا ق سقو فيليالىنىڭ ديرەكتورى ابىلاي نۇركەنوۆ.
قور ءوزىنىڭ نەسيە ونىمدەرى ارقىلى اۋىل تۇرعىندارى مەن اۋىل شارۋاشىلىعى تاۋارىن وندىرۋشىلەردىڭ جوبالارىن ءتۇرلى ماقساتتى باعىتتار بويىنشا قارجىلاندىرادى. ناقتى ايتار بولساق، مال شارۋاشىلىعىن، وسىمدىك شارۋاشىلىعىن، اۋىل كاسىپكەرلىگىن دامىتۋ جانە اۋىل شارۋاشىلىعى ونىمدەرىن قايتا وڭدەۋ مەن ساقتاۋ جوبالارى بار. 4-6-12 ميلليون تەڭگەگە دەيىنگى نەسيە 6,5 جىلعا 6 پروتسەنتپەن بەرىلەدى. جىلدىق ءتيىمدى سىياقى مولشەرى 6,7 پروتسەنتتەن اسپايدى. ايتا كەتۋ كەرەك، از قامتىلعان جانە كوپبالالى وتباسى مۇشەلەرىنە 4 پروتسەنتپەن بەرىلەتىن نەسيەنىڭ جىلدىق ءتيىمدى سىياقى مولشەرى 4,7 پروتسەنتتەن اسپايدى. ءبىر جىلعا دەيىنگى جەڭىلدىك مەرزىمى دە قاراستىرىلعان.