شىمكەنتتە قايىرشىنىڭ كەيپىنە ەنگەن الاياقتار 4,5 ميلليون تەڭگەنىڭ التىنىن ۇرلاپ كەتكەن
16 مامىر 20:21

شىمكەنتتە قايىرشىنىڭ كەيپىنە ەنگەن الاياقتار 4,5 ميلليون تەڭگەنىڭ التىنىن ۇرلاپ كەتكەن

شىمكەنت. قازاقپارات - شىمكەنتتىك ەكى تۇرعىن الاياقتىق قۇربانى بولدى. ەكى وقيعادا دا قايىرشىنىڭ كەيپىنە ەنگەن الاياقتار باعالى زاتتاردى قولدى ەتكەن، دەپ حابارلايدى قازاقپارات ءتىلشىسى.

ەسىكتى اشقان تۇرعىندارعا ۇيلەرىندە دۋا بار ەكەنىن ايتقان كۇدىكتىلەر تەز ارادا ءۇيدى تىلسىم كۇشتەن تازارتۋ كەرەكتىگىن جەتكىزگەن. ايتقانىنا سەنبەگەندەردى قايعى- قاسىرەت كەلەتىنىن ايتىپ قورقىتىپتى. ال، كەلىسىم بەرگەندەرىنە التىن، كۇمىس سەكىلدى باعالى زاتتارىن الدىرىپ، تازارتاتىنىن جەتكىزگەن. سودان زەرگەرلىك زاتتاردى قولىنا ۇستاعان كۇيى ءۇيدى اينالا ءجۇرىپ، ءبىراز ۋاقىتتان سوڭ ءىزىن سۋىتقان. جالپى كەلگەن شىعىن كولەمى - 4,5 ميلليون تەڭگە.

«اتالعان ءىس بويىنشا جەدەل- ىزدەستىرۋ شارالارىن جۇرگىزگەن ءتارتىپ ساقشىلارى بەينەباقىلاۋ كامەراسى ارقىلى كۇدىكتىلەر وتىرعان تاكسي جۇرگىزۋشىسىن تاپتى. سول ارقىلى كۇدىكتىنى تۇرعىلىقتى جەرىنەن ۇستادى» دەلىنگەن شىمكەنت قالاسى پوليسيا دەپارتامەنتىنىڭ باسپا ءسوز قىزمەتى تاراتقان حابارلامادا.

قازىرگى تاڭدا اتالعان جايت بويىنشا «الاياقتىق» بابىمەن سوتقا دەيىنگى تەرگەۋ امالدارى جۇرگىزىلىپ جاتىر.

اۆتور: قايرات زاينيشيەۆ

جاڭالىقتار