ە ا ە و ەلدەرىنىڭ جالپى ىشكى ءونىمى 4,5 پايىزعا ءوستى - پرەزيدەنت
بۇل تۋرالى ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى. «وداق مەملەكەتتەرى ەكونوميكاسىنىڭ بىرتىندەپ قالىپقا ءتۇسىپ كەلە جاتقاندىعى دا قۋانتادى. ەۋرازيالىق ەكونوميكالىق كوميسسيا مالىمەتتەرىنە سايكەس، وسى جىلدىڭ ءبىرىنشى جارتىجىلدىعىندا وداق ەلدەرىنىڭ جالپى ىشكى ءونىمىنىڭ ءوسىمى 4,5 پايىزدى قۇرادى. جيىنتىق جالپى ىشكى ءونىم 900 ميلليارد دوللارعا جۋىقتاپ قالدى»، - دەدى قاسىم- جومارت توقايەۆ جوعارى ەۋرازيالىق ەكونوميكالىق كەڭەس وتىرىسىندا.
دەگەنمەن، قازاقستان پرەزيدەنتى مۇنداي جەتىستىكتەردىڭ بار ەكەندىگىنە قاراماستان سىرتقى تاۋەكەلدەر مەن بەلگىسىزدىك فاكتورى ءالى دە جوعارى قالىپ وتىرعاندىعىن باسا ايتتى.
ەۋرازيالىق ەكونوميكالىق وداق ەلدەرى پاندەميانى ەڭسەرۋ ءۇشىن فارماتسيەۆتيكا سالاسىندا بىرلەسكەن جوبالاردى جۇزەگە اسىرۋى قاجەت.
«پاندەميامەن كۇرەستەگى ايتارلىقتاي تابىستارعا قاراماستان ەلدەر ءالى دە كۇردەلى جاعدايدا تۇر. كوروناۆيرۋستىڭ جاڭا شتامدارىنىڭ پايدا بولۋىنا جانە ازاماتتاردىڭ ۆاكسيناتسيالانۋىنىڭ جەتكىلىكسىزدىگىنە بايلانىستى ايتارلىقتاي تاۋەكەل ساقتالىپ وتىر. وزدەرىڭىزدە بىلەتىندەي، قازاقستان رەسەي فەدەراتسياسىمەن قاتار ءوزىنىڭ QazVac ۆاكسيناسىن ازىرلەي الدى. ول قازىرگى ۋاقىتتا قازاقستاندا بەلسەندى تۇردە قولدانىلىپ جاتىر. بۇگىندە ونى دۇنيەجۇزىلىك دەنساۋلىق ساقتاۋ ۇيىمىندا تىركەۋ پروتسەسى ءجۇرىپ جاتىر»، - دەدى قاسىم- جومارت توقايەۆ.
ق ر پرەزيدەنتى پاندەميا كەزىندە قاراعاندى قالاسىنداعى زاۋىتتا رەسەيدىڭ سپۋتنيك V ۆاكسيناسىن ءوندىرۋ جوباسىن ينتەگراتسيالىق ىنتىماقتاستىقتىڭ ەرەكشە ۇلگىسى دەپ سانايتىندىعىن باسا ايتتى.
«مۇنان ارى دا پاندەميانى تابىستى ەڭسەرۋ ءۇشىن كۇش- جىگەرىمىزدى بىرىكتىرىپ، عىلىم مەن فارماتسيەۆتيكا سالاسىندا بىرلەسكەن جوبالاردى جۇزەگە اسىرۋ، قاجەتتىلىك تۋىنداعان جاعدايدا سانيتارلىق- ەپيدەميولوگيالىق رەجيم ورناتۋ ءىس- ارەكەتتەرىن ۇيلەستىرۋ كەرەك»، - دەدى مەملەكەت باسشىسى.
اۆتور: مارلان جيەمباي