تۇركىستان وبلىسى شەتەلگە 4,5 مىڭ توننا سيىر ەتىن ەكسپورتتادى

تۇركىستان. قازاقپارات - تۇركىستان وبلىسىنىڭ اۋىل شارۋاشىلىق باسقارماسى باسشىسىنىڭ مىندەتىن اتقارۋشى نۇربەك بادىراقوۆ وڭىرلىك كوممۋنيكاتسيالار قىزمەتىندە بريفينگ وتكىزدى.

جيىندا مەكەمەنىڭ جىل باسىنان بەرى اتقارعان ىستەرى مەن الداعى جوسپارىن باياندادى، دەپ حابارلايدى قازاقپارات ءتىلشىسى.

بادىراقوۆتىڭ مالىمەتىنشە، 9 ايدا وڭىردە ءىرى قارا مال باسى سانى 11 پايىزعا ارتىپ، 972,6 مىڭعا جەتكەن. قوي باسى 4,3 ميلليون، جىلقى سانى 304 مىڭعا جەتكەن. ال، تۇيە 6,8 پايىزعا ارتىپ، 27,5 مىڭ باسقا، قۇس 8,2 پايىزعا ارتىپ، 1,93 ميلليونعا كوبەيگەن.

«مالدىڭ كوبەيۋىنە بايلانىستى وڭىردەگى ەت ءوندىرۋ كورسەتكىشى 7 پايىزعا ارتقان. ناتيجەسىندە وندىرىلگەن ەت كولەمى 154,7 مىڭ تونناعا جەتىپ وتىر. ال، جۇمىرتقا ءونىمى 9,2 پايىزعا ارتىپ، 146,7 ميلليون دانانى قۇرادى.

ءسۇت 3,2 پايىزعا ارتىپ، 555 مىڭ تونناعا جەتتى. جالپى وبلىستا 4,5 مىڭ توننا ءىرى قارانىڭ ەتى الىس جاقىن شەت ەلدەرگە ەكسپورتتالىپ، تاپسىرما 4,5 ەسەگە ورىندالدى. بۇل ەتتى ەكسپورتتاۋ بويىنشا ءوڭىرىمىزدىڭ رەسپۋبليكادا ءبىرىنشى ورىندا تۇرعانىن بىلدىرەدى»، - دەدى نۇربەك بادىراقوۆ.

بۇگىندە ايماقتا 2018-2027-جىلدارعا ارنالعان ۇزاق مەرزىمدى ەتتى مال شارۋاشىلىعىن دامىتۋ باعدارلاماسىنا سايكەس جۇمىس جوسپارى ازىرلەنگەن، قۇجاتتى اۋىل شارۋاشىلىعى مينيسترلىگى بەكىتتى. جوبا بويىنشا ۇرعاشى سيىردى 2027-جىلعا قاراي 1 218,7 مىڭ باسقا جەتكىزۋ، ونىڭ يمپورتتاۋدى 36 مىڭ باسقا جەتكىزۋ كوزدەلىپ وتىر.

ايتا كەتەيىك، اتالعان باعدارلامانىڭ نەگىزگى مىندەتى - فەرمەرلىك شارۋاشىلىقتاردى دامىتۋ. ونىڭ اياسىندا مال باسىن كوبەيتەمىن دەۋشىلەرگە 15 جىلعا دەيىن، 4 پايىزبەن نەسيە بەرىلەدى.