الماتىدا وقشاۋلانۋ دەڭگەيى 4,4 بالل بولدى

الماتى. قازاقپارات - الماتىدا «سەرگەك» مالىمەتتەرىنە سايكەس قالاداعى وقشاۋلانۋ دارەجەسىنە باعا بەرىلدى، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.

تالداۋعا سايكەس 2020 -جىلدىڭ 11 - ناۋرىزىنان باستاپ الماتى جولدارىنداعى كولىك قوزعالىسى 80 پايىزعا تومەندەگەن. «سالىستىرۋ ءۇشىن كارانتينگە دەيىنگى «سەرگەك» جۇيەسىندە تىركەلگەن جۇمىس كۇنىندەگى جول قوزعالىسى مەن توتەنشە جاعدايدان كەيىنگى جول قوزعالىسى مالىمەتتەرى پايدالانىلدى. 5 دەگەن بالل كورسەتكىشى قالادا مۇلدە جەكە كولىك قوزعالىسى جوق ەكەندىگىن بىلدىرەدى. ال كارانتينگە دەيىنگى قوزعالىس كورسەتكىشى 0,5 بالل بولاتىن. ەگەر 0 بالل بولسا، وندا كوشەدە كەپتەلىس دەگەندى بىلدىرەدى. كارانتين كەزىندە الماتىدا ماكسيمالدى كورسەتكىش 4,8 بالل بولۋى ءتيىس. ويتكەنى، جولدا ارنايى قىزمەت وكىلدەرى جەدەل جاردەم، پوليتسيا، كوممۋنالدى قىزمەت كولىكتەرى جۇرەدى. كەشەندى ءىس- شارالار مەن ازاماتتاردىڭ ءتارتىبىنىڭ ارقاسىندا وقشاۋلانۋ كورسەتكىشىن 4,4 بالعا جەتكىزىلدى» ، - دەدى باسپا ءسوز قىزمەتىنەن.