قازاقستاندا جىل باسىنان بەرى ج ءى ءو ءوسىمى 4,2 پايىزدى كورسەتتى – ۇ ە م

نۇر- سۇلتان. قازاقپارات - وسى جىلدىڭ 7 ايىنىڭ قورىتىندىسى بويىنشا جالپى ىشكى ءونىمنىڭ ءوسىمى 4,2 پايىزعا دەيىن جەدەلدەدى. بۇل تۋرالى ۇكىمەت وتىرىسىندا بايانداما جاساعان ۇلتتىق ەكونوميكا ءمينيسترى رۋسلان دالەنوۆ ءمالىم ەتتى، دەپ حابارلايدى قازاقپارات ءتىلشىسى.

«وسى جىلدىڭ 7 ايىنىڭ قورىتىندىسى بويىنشا جالپى ىشكى ءونىمنىڭ ءوسىمى 4,2 پايىزعا دەيىن جەدەلدەدى. قاڭتار- ماۋسىمدا بۇل كورسەتكىش 4,1 پايىزدى قۇراعان ەدى. سەرپىن ونەركاسىپتەگى، قۇرىلىستاعى جانە كورسەتىلەتىن قىزمەتتەر سالاسىنداعى جەدەلدەۋمەن، سونداي- اق اۋىل شارۋاشىلىعى مەن نەگىزگى كاپيتالعا سالىنعان ينۆەستيتسيالاردىڭ تۇراقتى قارقىنىمەن قامتاماسىز ەتىلىپ وتىر. ينفلياتسيا دەڭگەيى جىلدىق مانىندە 5,4 پايىزدى قۇرادى. بۇل ينفلياتسيا ءدالىزىنىڭ 4-6 پايىزىنىڭ شەگىندە»، - دەدى ۇلتتىق ەكونوميكا ءمينيسترى 2019 -جىلدىڭ 7 ايىنىڭ قورىتىندىسى بويىنشا بەرگەن ەسەبىندە.

ءمينيستردىڭ ايتۋىنا قاراعاندا، ينۆەستيتسيالار سەرپىنى جالپى ىشكى ءونىمنىڭ ءوسۋ قارقىنىنان وزىق بولىپ وتىر (11,3 پايىز). ينۆەستيتسيالار اۋىل شارۋاشىلىعىندا 61,4 پايىزعا، قۇرىلىستا 46,3 پايىزعا، ساۋدادا 23,0 پايىزعا جانە ونەركاسىپتە 18,9 پايىزعا وسكەن.

ەسكە سالا كەتسەك، رۋسلان دالەنوۆ وسىدان ەكى اي بۇرىن دا ج ءى ءو ءوسىمى 4 پايىزدى قۇراعانىن حابارلاعان بولاتىن.

اۆتور: ايان بەكەن ۇلى