سەمەي ورمانىندا 3 مامان قازا بولدى: پرەزيدەنت ت ج م باسشىسىنا شۇعىل تاپسىرما بەردى
مەملەكەت باسشىسى قاسىم- جومارت توقايەۆ توتەنشە جاعدايلار ءمينيسترى يۋري يلينگە تاپسىرما بەردى، دەپ حابارلايدى قازاقپارات اقورداعا سىلتەمە جاساپ.
«اباي وبلىسىنداعى الاپات ورتكە بايلانىستى پرەزيدەنت توتەنشە جاعدايلار ءمينيسترى يۋري يلينگە وقيعا ورنىنا جەدەل بارىپ، ءورت ءسوندىرۋ جۇمىستارىن باسقارۋ مىندەتىن جۇكتەدى ۇكىمەتكە جانە اباي وبلىسىنىڭ اكىمدىگىنە قازا تاپقان ورمان شارۋاشىلىعى قىزمەتكەرلەرىنىڭ وتباسىلارىنا بارلىق قاجەت كومەكتى كورسەتۋ تاپسىرىلدى.
ت ج م مالىمەتىنە سايكەس، ورمان شارۋاشىلىعىنىڭ ءۇش قىزمەتكەرى قازا تاپتى، تاعى 11 قىزمەتكەر ىزدەستىرىلىپ جاتىر»، - دەلىنگەن مالىمەتتە.
ەسكە سالايىق، ازداعان ۋاقىت بۇرىن سەمەي قالاسىندا جەرگىلىكتى اۋقىمدا تابيعي سيپاتتاعى توتەنشە جاعداي رەجيمى جاريالاندى.
«سەمەي» ورمانى رەزەرۆاتىندا ءورت 8-ماۋسىم كۇنى شىققان بولاتىن. «ءورت نايزاعايدىڭ 2 رەت سوعۋىنان شىققان. ءورتتى تەز ارادا اۋىزدىقتاۋ مۇمكىن بولمادى، وعان سەبەپ «سەمەي ورمانى» مەملەكەتتىك ورمان تابيعي رەزەرۆاتى تەحنيكاسى بيىك قۇم توبەلەرى ورنالاسقان ايماققا جەتە المادى»، - دەگەن بولاتىن اباي وبلىسى اكىمىنىڭ ورىنباسارى ديميتري گاريكوۆ.
ورمان ءورتىن سوندىرۋمەن اينالىسىپ جاتقان 14 مامانمەن بايلانىس ۇزىلگەنىن بۇعان دەيىن حابارلاعان بولاتىنبىز.