وزبەكستان توقىما ونىمدەرى ەكسپورتىنان جىلىنا 3 ميلليارد دوللار تاۋىپ وتىر
نامانگاننىڭ چۋسك اۋدانىنداعى ارنايى ەكونوميكالىق ايماقتا 20-دان اسا تىگىن فابريكاسى بار. جەڭىل ونەركاسىپ كلاستەرىنىڭ نەگىزىن جەرگىلىكتى ينۆەستورلار قۇرايدى. ورتاشا جالاقى 300 دوللاردان كەم ەمەس. ەسەسىنە فابريكادا جاتىن ورىن مەن تاماق تەگىن. قىزمەتكەرلەر قالادان قاتىناپ جۇمىس ىستەيدى. كاسىپورىن ماڭىندا بالاباقشا بوي كوتەرىپ جاتىر. ينۆەستور جۇمىسشىلارعا بارىنشا جاعداي جاساپ، تاپقان تابىسىن ەلدىڭ مۇددەسىنە جاراتقان.
ديلشود يسماتۋللايەۆ، فابريكانىڭ قۇرىلتايشىسى:
- فابريكادا 2 مىڭ ادام جۇمىس ىستەيدى. 15 مەملەكەتكە ءونىم ەكسپورتتايمىز. الەمدىك برەندتەر تاپسىرىس بەرەدى. وتكەن مامىر ايىندا 3 ميلليون دوللار تابىس تاپتىق. 2017 -جىلى مەملەكەت بىزگە ارنايى ەكونوميكالىق ايماقتان 15 گەكتار جەر بەرىپ، جاڭا كاسىپ باستاعانبىز. قازىر وستىك، ۇلعايدىق. ءبىز جەرگىلىكتى ينۆەستورمىز. سىرتتان كەلگەن كاسىپكەردەن باستى ايىرماشىلىعىمىز - تەزىرەك پايدا تاۋىپ، قايتۋدى ەمەس، وسى جەردىڭ كەلەشەكتە كوكتەپ- كوركەيۋىنە جۇمىس ىستەيمىز.
وبلىستىڭ توقىما كلاستەرىنە جەرگىلىكتى عانا ەمەس، تاجىكستاننان دا جۇمىسشى تارتىلادى. سەبەبى تاپسىرىس كوپ. جۇمىس كۇشى جەتىسپەيتىن كەزدەر بولادى. زاماناۋي قوندىرعىلاردىڭ دەنى گەرمانيادان اكەلىنگەن. ونى شەكارادان الىپ ءوتۋ بۇرىنعىداي قيىنعا سوقپايدى. كاسىپكەرلەرگە جەڭىلدىك جاسالعان.
شاۆكاتبەك زاينۋتدينوۆ، فابريكانىڭ باسقارۋشى ديرەكتورى:
- ەرلەرگە ارنالعان كيىم شىعارامىز. گەرمانيا، فرانسيا، تۇركياعا ءونىم ەكسپورتتايمىز. قازاقستاننان دا تاپسىرىس تۇسەدى. مەكتەپ فورماسىن دا شىعارىپ بەردىك. ءبىزدىڭ وڭىردە تىگىن فابريكالارى وتە كوپ. وسى كومپانيانىڭ وزىندە 8 بىردەي شەبەرحانا بار.
بۇقارا ءوڭىرى دە جەڭىل ونەركاسىپ سالاسىندا وزىق تاجىريبە كورسەتىپ كەلەدى. كاسىپورىندار اراسىندا ءبىر- بىرىمەن تىعىز بايلانىس بار. ماقتانى ەگىپ، ونى تەرۋمەن عانا شەكتەلمەيدى. ارنايى فابريكادا تەرەڭ وڭدەپ، ءجىپ، كەيىن ءتۇرلى- ءتۇستى ماتا دايىندايدى. ءبىر عانا سەحتا جۇزدەگەن ادام جۇمىس ىستەيدى. شەتەلدەن تەك تەحنولوگيالىق پروتسەسكە جاۋاپتى ماماندار تارتىلعان.
شەرمۇحاماد اچيلوۆ، يىرىلگەن ءجىپ جانە ماقتا دايىنداۋ فابريكاسىنىڭ وكىلى:
- توقىما ونەركاسىبى ۇلتتىق برەندىمىزگە اينالۋى كەرەك. پرەزيدەنتىمىز تاراپىنان وسى سالاعا ەرەكشە كوڭىل ءبولىنىپ وتىر. ۇكىمەتكە ەش رەنىشىمىز جوق. مۇندا تىگىلگەن كيىم- كەشەكتەر ەۋروپا جانە ت م د ەلدەرىنە ەكسپورتتالىپ جاتىر. فابريكا بيىل ەكسپورتقا 50 ميلليون دوللاردىڭ ءونىمىن جونەلتپەك. بىلتىر كورسەتكىش 30 ميلليوننىڭ شاماسىندا بولدى.
وزبەكستان بۇل سالادا جىلىنا 3 ميلليارد دوللاردىڭ ءونىمىن شەتەلگە ەكسپورتتاپ وتىر. تەرى وڭدەپ، اياق- كيىم جاساۋ دا جولعا قويىلعان. سوڭعى جىلدارى قازاقستانمەن تىعىز بايلانىس ورناپ، ەكسپورتتىق جانە يمپورتتىق كەلىسىمدەر جاسالدى. بۇل سالادا كورشىمىز تاجىريبە ءبولىسىپ، سەنىمدى سەرىكتەس اتانۋعا دايىن.
راۋان مىڭبايەۆ