پەتروپاۆلدى رەسەيگە قوسۋدى سۇراعان ايەل 3 جىلعا سوتتالدى

None
پەتروپاۆل. قازاقپارات - پەتروپاۆل تۇرعىنى سەپاراتيستىك ارەكەتى ءۇشىن 3 جىلعا باس بوستاندىعىنان ايىرىلدى، دەپ حابارلايدى قازاقپارات ءتىلشىسى.

سولتۇستىك قازاقستان وبلىستىق سوتىنىڭ مالىمەتىنشە، پەتروپاۆل قالالىق سوتى ق ر قىلمىستىق كودەكسىنىڭ 180-بابى 2-بولىگى «تەلەكوممۋنيكاتسيا جەلىلەرىن پايدالانا وتىرىپ، قازاقستان رەسپۋبليكاسىنىڭ ءبىرتۇتاستىعىن، ونىڭ اۋماعىنا قول سۇعىلماۋىن جانە بولىنبەۋىن بۇزۋدى ناسيحاتتاۋ» بويىنشا س. - عا قاتىستى قىلمىستىق ءىستى قارادى.

«پەتروپاۆل تۇرعىنى 2021 -جىلعى 6- قىركۇيەك كۇنى شامامەن ساعات 22.00 دە اپكەسىنىڭ ۇيالى تەلەفونىن پايدالانا وتىرىپ، بەينەبايلانىس ارقىلى الەمنىڭ تۇكپىر- تۇكپىرىنەن پايدالانۋشىلاردىڭ ءانونيمدى قارىم- قاتىناسىنا ارنالعان «چات رۋلەتكا» قوسىمشاسىنا كىرگەن. كەزدەيسوق قوسىلۋ ناتيجەسىندە بۇرىن تانىس ەمەس ەر اداممەن ونلاين اڭگىمە باستاعان.

«چات رۋلەتكا» قوسىمشاسىنداعى بەينەبايلانىس ارقىلى اڭگىمەلەسۋ بارىسىندا س. كەزدەيسوق پايدالانۋشى- اڭگىمەلەسۋشىنىڭ سۇراقتارىنا سولتۇستىك قازاقستان وبلىسىنىڭ پەتروپاۆل قالاسىن رەسەي فەدەراتسياسىنىڭ قۇرامىنا الۋىن وتىنە باستاعان. ەر ادام اڭگىمەلەسۋدى جازىپ الىپ، سول كۇنى جازبانى YouTube بەينەحوستينگىندە جاريالادى»، - دەلىنگەن باسپا ءسوز حابارلاماسىندا.

پروكۋرور س. -نى 6 جىلعا باس بوستاندىعىنان ايىرۋدى، قىلمىستىق- اتقارۋ جۇيەسىنىڭ قاۋىپسىزدىگى ورتاشا مەكەمەسىندە جازاسىن وتەۋدى تاعايىنداۋدى سۇرادى. سوتتالۋشى كىنانى ءىشىنارا مويىندادى. ايىپتالۋشىنىڭ كىناسى تولىق دالەلدەندى.

ناتيجەسىندە پەتروپاۆل قالالىق سوتى س. -نىڭ جۇبايى 1-توپتاعى مۇگەدەك ەكەندىگىن جانە ونىڭ جاس بالاسىنىڭ بولۋىن ەسكەرىپ، وعان 3 جىلعا باس بوستاندىعىنان ايىرۋ جازاسىن تاعايىندادى. جازاسىن قىلمىستىق- اتقارۋ جۇيەسىنىڭ ورتاشا قاۋىپسىزدىك مەكەمەسىندە وتەيتىن بولادى.


سوڭعى جاڭالىقتار