الماتىدا قالالىق سپورت باسقارماسىنىڭ بۇرىنعى 3 قىزمەتشىسى سوتتالدى

None
Фото: gov.kz
الماتى. قازاقپارات - الماتى قالاسى مەدەۋ اۋدانىنىڭ 2№ سوتىندا قالالىق سپورت باسقارماسىنىڭ بۇرىنعى قىزمەتكەرلەرىنە قاتىستى ءىس قارالدى، دەپ حابارلايدى قازاقپارات ءتىلشىسى.

الماتى قالالىق سوتىنىڭ مالىمەتىنشە، 2020-جىلعى قاراشا - 2021-جىلعى جەلتوقسان ارالىعىندا سپورت باسقارماسى قالادا كەشەندى سپورتتىق باعدارلامالاردى ىسكە اسىرۋ بويىنشا مەملەكەتتىك ساتىپ الۋ كونكۋرستارىن وتكىزگەن.

سپورت باسقارماسىنىڭ باسشىسى قارجى-ەكونوميكالىق جانە جوعارى جەتىستىكتەر سپورتى بولىمدەرىنىڭ باسشىلارىمەن الدىن الا ءسوز بايلاسىپ، لاۋازىمدىق وكىلەتتىكتەرىن اسىرا پايدالانا وتىرىپ، قىزمەتتەردى جوعارى باعامەن ساتىپ العان، سونداي-اق ءىس جۇزىندە ورىندالماعان جۇمىستارعا اقى تولەگەن.

سونداي-اق، ج ش س ديرەكتورى ءبىرقاتار ءىس-شارالاردى وتكىزۋگە باسقارما تاراپىنان رۇقسات الىپ، ماراپاتتاۋ ونىمدەرىن، سپورتتىق جابدىقتاردى ساتىپ الۋ شىعىندارىن اسىرا باعالاۋ جانە ءبىرقاتار ءىس-شارالاردى ورىنداماۋ ارقىلى سپورتتىق جارىستاردى وتكىزۋگە بولىنگەن بيۋجەت قاراجاتىن ۇرلاعانى انىقتالدى.

«سوت جازا تاعايىنداۋ كەزىندە جاسالعان قىلمىستىڭ سيپاتى مەن قوعامدىق قاۋىپتىلىك دارەجەسىن، كىنالىلەردىڭ جەكە باسىن، ونىڭ ىشىندە قىلمىس جاساعانعا دەيىنگى جانە ودان كەيىنگى مىنەز-قۇلىقتارىن ەسكەردى. سوتتىلىقتىڭ بولماۋى، جاس بالالارىنىڭ بولۋى سەكىلدى جەڭىلدەتەتىن جاعدايلار ەسكەرىلدى. ايىپتى اۋىرلاتاتىن جاعدايلار انىقتالمادى»، - دەلىنەدى حابارلامادا.

3 مەملەكەتتىك قىزمەتشىگە مەملەكەتتىك قىزمەتتە جۇمىس ىستەۋگە ءومىر بويىنا تىيىم سالىنا وتىرىپ، 3 جىلدان 4 جىل 6 ايعا دەيىنگى مەرزىمگە باس بوستاندىعىنان ايىرىلدى. ق ر پرەزيدەنتىنە سپورت باسقارماسى باسشىسىنىڭ «ەرەن ەڭبەگى ءۇشىن» مەملەكەتتىك ماراپاتىنان ايىرۋ تۋرالى ۇسىنىس ەنگىزىلدى.

«ج ش س ديرەكتورىنا 7 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى. سوتتالعانداردان مەملەكەت كىرىسىنە 330 ميلليون تەڭگە سوماسىندا ماتەريالدىق زالال ءوندىرىلدى. ۇكىم زاڭدى كۇشىنە ەنگەن جوق»، - دەپ حابارلادى قالالىق سوتتا.

ەسكە سالساق، الماتى قالاسى سپورت باسقارماسىنىڭ بۇرىنعى باسشىسى 4,5 جىلعا سوتتالعانى تۋرالى حابارلاعانبىز.

ايتا كەتەيىك، بۇعان دەيىن الماتى قالاسى سپورت باسقارماسىنىڭ لاۋازىمدى تۇلعالارى 360 ميلليون تەڭگەدەن استام قارجىنى جىمقىردى دەگەن كۇدىككە ىلىنگەن بولاتىن.

كەيىن سىبايلاس جەمقورلىققا قارسى اگەنتتىگى الماتى قالالىق سپورت باسقارماسىنىڭ بۇرىنعى باسشىسىنا جانە باسقا ادامدارعا قاتىستى 367,5 ميلليون تەڭگە ۇرلاۋ فاكتىسى بويىنشا تەرگەۋ اياقتالعانىن حابارلاعان ەدى.

سوڭعى جاڭالىقتار