ەلوردادا 3- ساۋىردەن ءبىرىنشى سىنىپقا قۇجات قابىلداۋ باستالادى

استانا. قازاقپارات - ءبىرىنشى سىنىپ وقۋشىلارىنىڭ قۇجاتىن قابىلداۋ 1- ساۋىردە باستالىپ، 1- تامىزعا دەيىن جالعاسادى.

بۇل تۋرالى استانا قالاسى ءبىلىم باسقارماسى باسشىسىنىڭ ورىنباسارى مارجانگۇل قايربايەۆا ءمالىم ەتتى، دەپ حابارلايدى قازاقپارات ءتىلشىسى.

«1- ساۋىردەن باستاپ 1- تامىزعا دەيىن جالپى ورتا ءبىلىم بەرەتىن مەكتەپتەردە ءبىرىنشى سىنىپقا باراتىن بالالاردىڭ قۇجاتتارى قابىلدانۋى ءتيىس. الايدا بيىل 1- ءساۋىر سەنبى كۇنىنە ءدال كەلىپ تۇرعاندىقتان، قۇجاتتار 3- ساۋىردەن باستاپ قابىلدانادى. بيىلعى وقۋ جىلىندا ءبىرىنشى سىنىپقا 26 مىڭعا جۋىق بالا كەلەدى دەپ ەسەپتەلىپ وتىر»، - دەدى م. قايربايەۆا استانا قالاسىنىڭ كوممۋنيكاتسيالار قىزمەتىندەگى باسپا ءسوز ءماسليحاتىندا.

ونىڭ ايتۋىنشا، ءبىلىم بەرۋ ۇيىمدارى مەكتەپ ماڭىندا تۇراتىن 6 جاستاعى بالالاردى ءبىرىنشى سىنىپقا قابىلداۋدى قامتاماسىز ەتەدى. دارىندى وقۋشىلارعا ارنالعان ءتيىستى مەكتەپتەردەن باسقالارى ءبىرىنشى سىنىپقا باراتىن بالالاردى ەشقانداي ەمتيحانسىز قابىلدايدى. ءار مەكتەپتە اتا-انالارعا كومەكتەسۋ ماقساتىندا ءبىرىنشى سىنىپقا قابىلداۋ بويىنشا كوميسسيا قۇرىلدى.

«اتا-انالار قۇجاتتاردى «ەلەكتروندى ۇكىمەت» (www.egov.kz) ۆەب-پورتالى ارقىلى نەمەسە مەكتەپتەردە قاعاز تۇرىندە دە تاپسىرا الادى»، - دەدى باسقارما وكىلى.

بالالاردى ءبىرىنشى سىنىپقا قابىلداۋ ءۇشىن مىنا قۇجاتتاردى تاپسىرۋ كەرەك: اتا-انا ءوتىنىشى، بالانىڭ تۋۋ تۋرالى كۋالىگىنىڭ كوشىرمەسى، دەنساۋلىق جاعدايى تۋرالى انىقتاما جانە 3x4 كولەمىندەگى 2 فوتوسۋرەت.

«ءبىلىم بەرۋ ۇيىمى اتا-انادان تىزىمدە كورسەتىلمەگەن باسقا قۇجاتتاردى تالاپ ەتە المايدى»، - دەپ ناقتىلادى م. قايربايەۆا.