اڭساعان ءسابي: تاعى 3 مىڭعا جۋىق ايەل انا اتانعالى وتىر
بۇل تۋرالى دەنساۋلىق ساقتاۋ ءمينيسترى اجار عينيات ءمالىم ەتتى، دەپ حابارلايدى قازاقپارات ءتىلشىسى.
«ەلىمىزدە جىل سايىن 400 مىڭنان استام ايەل بوسانادى. جۇكتى ايەلدەردىڭ %99 مەديتسينا قىزمەتكەرلەرىنىڭ ءجىتى باقىلاۋىندا. تۋا بىتكەن كەمشىلىكتەردى انىقتاۋ ءۇشىن جۇكتى ايەلدەردى سكرينينگپەن قامتۋ %10 عا ارتتى. وتكەن جىلى كلينيكالىق حاتتامالاردى جەتىلدىرۋ، جۇكتى ايەلدەردى ەمدەۋگە جاتقىزۋدى ناقتى باعىتتاۋ، دەر كەزىندە تەلەمەديتسينالىق كونسۋلتاتسيالار جانە ساناۆياتسيالىق ۇشۋلاردى ۇيىمداستىرۋدىڭ ناتيجەسىندە اۋىر جاعدايداعى 1 مىڭنان استام ايەلدىڭ ءومىرى ساقتاپ قالىندى»، - دەدى اجار عينيات ۇكىمەت وتىرىسىندا.
ءمينيستردىڭ مالىمدەۋىنشە، مەديتسينالىق كومەكتى ۇيىمداستىرۋدى جاقسارتۋ ناتيجەسىندە جۇكتى ايەلدەردىڭ ءولىمى 100 مىڭ ءتىرى تۋىلعان سابيگە شاققاندا 2,6 ەسەگە تومەندەدى.
ودان ءارى اجار عينيات بەدەۋلىك ماسەلەسىن كوتەردى. ايتۋىنشا، بەدەۋلىك وتاندىق دەنساۋلىق ساقتاۋ سالاسىنداعى ايتۋلى پروبلەمالاردىڭ ءبىرى. ونى شەشۋ ەلدەگى دەموگرافيالىق جاعدايدى ارتتىرىپ، ءارتۇرلى سەبەپتەرگە بايلانىستى ءسابي ءسۇيۋ مۇمكىندىگىنەن ايرىلعان ايەلدەرگە مۇمكىندىك بەرەدى.
«مەملەكەت باسشىسىنىڭ تاپسىرماسىنا سايكەس ءبىزدىڭ مينيسترلىك «اڭساعان ءسابي» باعدارلاماسىن ىسكە اسىرۋدى جالعاستىرۋدا. وسى كۇنگە دەيىن 14000 ايەلگە ەكستراكورپورالدىق ۇرىقتاندىرۋ قىزمەتى ۇسىنىلدى. باعدارلامانى ىسكە اسىرۋ بارىسىندا 6 مىڭنان استام ايەل جۇكتى بولىپ، 2800 وتباسىندا كوپتەن كۇتكەن 3200 نارەستە دۇنيەگە كەلدى. قازىر 3 مىڭعا جۋىق جۇكتى ايەل ءسابيلى بولعالى وتىر. اتالعان باعدارلاماعا «دەنى ساۋ ۇلت» ۇلتتىق جوباسى شەڭبەرىندە جىل سايىن 7 مىڭ كۆوتا ءبولۋ كوزدەلگەن»، - ا. عينيات.