بيىل ەلدەگى 3 مۇناي وڭدەيتىن زاۋىت جوندەۋدەن وتەدى

استانا. قازاقپارات - ەنەرگەتيكا ءمينيسترى بولات اقشولاقوۆ ۆەدومستۆونىڭ كەڭەيتىلگەن القا ماجىلىسىندە ەلدەگى ءۇش مۇناي وڭدەيتىن زاۋىتتىڭ ءبارى بيىل جوندەۋدەن وتەتىنىن ايتتى، دەپ حابارلايدى قازاقپارات ءتىلشىسى.

«2022-جىلى اي-92 بەنزينى مەن ديزەل وتىنىنىڭ رەكوردتىق مولشەرىن وندىردىك. وسىنداي كورسەتكىشكە قول جەتكىزۋ شىمكەنت مۇناي وڭدەۋ زاۋىتىنداعى كۇردەلى جوندەۋدى 2023-جىلعا اۋىستىرۋعا بايلانىستى بولدى. بيىل بارلىق 3 مۇناي وندەۋ زاۋىتىندا جوسپارلى جوندەۋ جۇمىستارىنىڭ جۇرگىزىلەتىنىن ەسكەرسەك، ءوندىرىس كولەمى 13,4 ميلليون توننا دەڭگەيىندە بولادى دەپ بولجانادى»، - دەدى مينيستر.

سونداي-اق بولات اقشولاقوۆ شىمكەنت مۇناي وندەۋ زاۋىتىن كەڭەيتۋدىڭ تەحنيكالىق-ەكونوميكالىق نەگىزدەمەسىن جوبالاۋ باستالاتىنىن ايتتى.

«بيىل مينيسترلىكتىڭ نەگىزگى مىندەتى - ىشكى نارىقتى ساپالى مۇناي ونىمدەرىمەن تولىق قامتاماسىز ەتۋ. ەكونوميكانىڭ ساپالى جانار- جاعارمايعا دەگەن سۇرانىسىن قامتاماسىز ەتۋ ءۇشىن بيىل ءوندىرىستى جىلىنا 6 ميلليون توننادان 9 ميلليون تونناعا دەيىن، كەلەشەكتە جىلىنا 12 ميلليون تونناعا دەيىن ۇلعايتۋدى كوزدەپ وتىرمىز»، - دەدى ۆەدومستۆو باسشىسى.