جايىق جانە قيعاش وزەن ساعاسىن تەرەڭدەتۋگە 3 ميلليارد تەڭگە جۇمسالماق
بۇل تۋرالى بۇگىن ۇكىمەت وتىرىسىندا ق ر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ ايتتى، دەپ حابارلايدى قازاقپارات ءتىلشىسى.
«بالىقتاردىڭ تابيعي ۋىلدىرىق شاشۋىنا جاعداي جاساۋ بويىنشا ءىس- شارالار قابىلدانۋدا. مەملەكەت باسشىسىنىڭ تاپسىرماسىن ورىنداۋ ماقساتىندا جايىق جانە قيعاش وزەندەرىنىڭ ساعالارىن تەرەڭدەتۋ جۇمىستارى جۇرگىزىلۋدە. وسى ماقساتتارعا بيىل 3 ميلليارد تەڭگە ءبولىندى جانە قىركۇيەكتەن باستاپ بالىق وتەتىن ارنالاردا ۇزىندىعى 32 شاقىرىم سۋ ءتۇبىن تەرەڭدەتۋ جۇمىستارى جۇرگىزىلدى. كەلەسى جىلعا 3 ميلليارد تەڭگە كوزدەلگەن»، - دەدى مينيستر ۇكىمەتتە بالىق سالاسىن دامىتۋ باعدارلاماسىنىڭ بيىلعى قورىتىندىسىن بايانداي كەلە.
سونىمەن قاتار ول كەمە قاتىناسى سۋ جولدارىندا ءتۇپ تەرەڭدەتۋ جۇمىستارىن جۇرگىزۋ ماسەلەسى وزەكتى بولىپ قالا بەرەتىندىگىن ايتتى.
«بۇعان يندۋستريا جانە ينفراقۇرىلىمدىق دامۋ مينيسترلىگى كەلەسى جىلعا ارنالعان رەسپۋبليكالىق بيۋدجەتتى العاشقى ناقتىلاۋ اياسىندا قاراجات كوزدەۋدى جوسپارلاپ وتىر»، - دەدى ول.
بۇعان دەيىن ەلىمىزدە بالىق ونىمدەرىن ءوندىرۋ سۋبسيديالاناتىنى ايتىلدى.