ۇزدىك پەداگوگتارعا 3 ميلليون تەڭگە مەن توسبەلگى تابىستالادى
وقۋ-اعارتۋ مينيسترلىگىنىڭ مالىمەتىنشە، «ۇزدىك پەداگوگ-2022» كونكۋرسىنا قاتىسۋعا قۇجات قابىلداۋ جالعاسىپ جاتىر. العاشقى اپتادا ەلىمىزدىڭ ءار وڭىرىنەن 2,6 مىڭنان استام مۇعالىم مەن تاربيەشى ءوز وتىنىمدەرىن جولداپ ۇلگەردى.
قۇجات قابىلداۋ 12- قىركۇيەكتە باستالىپ، 2022-جىلعى 22-قىركۇيەككە دەيىن جالعاسادى. بايقاۋعا مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ ۇيىمدارىنىڭ پەداگوگتەرى قاتىسا الادى. جەڭىمپازدار 3 ميلليون تەڭگە كولەمىندە سىياقى الادى. بىلتىر ەلىمىزدىڭ ءار وڭىرىنەن 64 مۇعالىمنىڭ ءارقايسىسى 3 ميلليون تەڭگەدەن العان بولاتىن.
«بيىل بايقاۋدى سيفرلاندىرۋدىڭ ارقاسىندا ءبىز كونكۋرستىڭ ءۇش كەزەڭىنە دە قانشا مۇعالىم قاتىساتىنىن باقىلاي الامىز. ءبىرىنشى اپتادا https://teachercontest.iac.kz/ ۆەب-پورتالىندا 2630 مۇعالىم مەن تاربيەشى تىركەلدى. بيىل بايقاۋعا قاتىساتىن ءاربىر مۇعالىم ساۋالنامانى تولتىرعاننان كەيىن بايقاۋدىڭ ودان ارعى ديناميكاسىن، ياعني قاتىسۋشىلاردىڭ قاي كەزەڭدە ەكەنىن، ولارعا ساراپشىلار قانداي ۇپاي بەرگەنىن باقىلاي الادى»، - دەدى وقۋ-اعارتۋ مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا.
«ۇزدىك پەداگوگ» اتاعىنىڭ يەگەرلەرىنە 3 ميلليون تەڭگە كولەمىندەگى اقشالاي سىياقى عانا ەمەس، توسبەلگىلەر دە بەرىلەدى.
بايقاۋ ەرەجەلەرى تۋرالى قوسىمشا اقپاراتتى وقۋ-اعارتۋ مينيسترلىگىنىڭ سايتىنان تابۋعا بولادى.