جەر قويناۋىن ءوز بەتىنشە پايدالانعاندار 3 جىلعا دەيىن باس بوستاندىعىنان ايىرىلۋى مۇمكىن
ماجىلىستە ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشيەۆ قىلمىستىق كودەكسكە وسىنداي تۇزەتۋ ەنگىزۋدى ۇسىندى، دەپ حابارلايدى قازاقپارات ءتىلشىسى.
«قىلمىستىق كودەكستىڭ «جەر قويناۋىن ءوز بەتىنشە پايدالانۋ»، ياعني، 334-بابىندا جازانىڭ بۇلتارتپاستىعىن قامتاماسىز ەتۋ جانە جەر قويناۋىن زاڭسىز وندىرۋگە جول بەرمەۋ ماقساتىندا 334-باپتىڭ 1-بولىگى «قىلمىستىق تەرىس قىلىق» ساناتىنان «قىلمىسقا» اۋىستىرىلىپ، 3 جىلعا دەيىن باس بوستاندىعىنان ايىرۋ تۇرىندەگى جازانى ەنگىزۋ ارقىلى سانكسيا كۇشەيتىلەدى.
وسى باپتىڭ 2-بولىگىنىڭ سانكسياسى دا 3 جىلدان 4 جىلعا باس بوستاندىعىنان ايىرۋ تۇرىندەگى جازانى قاتاڭداتۋ ارقىلى وزگەرتىلدى. وسى باپتىڭ 1-بولىگىنىڭ ديسپوزيتسياسىنا وزگەرىستەر ەنگىزىلدى. اتاپ ايتقاندا، قىلمىستىق قۇقىق بۇزۋشىلىقتىڭ قۇرامىن قالىپتاستىرۋ ءۇشىن كەلتىرىلگەن زالال مولشەرىنىڭ شەگى، ياعني ءىرى مولشەردەن ەلەۋلى زالالعا دەيىن تومەندەتىلدى. 3-بولىمدە ەرەكشە قورعالاتىن تابيعي اۋماقتا اسا ءىرى زالال كەلتىرگەنى ءۇشىن جازانىڭ نەعۇرلىم قاتاڭ ءتۇرىن قاراستىرۋ ۇسىنىلادى»، - دەدى مينيستر.
ونىڭ ايتۋىنشا، «اعاشتار مەن بۇتالاردى زاڭسىز كەسۋ، جويۋ نەمەسە زاقىمداۋ» كودەكستىڭ 340-بابىندا «تەرىس قىلىق» ساناتىنان «قىلمىس» ساناتىنا اۋىستىرۋ تۋرالى وزگەرىستەر ەنگىزىلگەن. «ەرەكشە قورعالاتىن تابيعي اۋماقتار رەجيمىن بۇزۋ» 342-بابىنىڭ 1-بولىگى كۇشەيتىلەدى جانە بىلىكتىلىك بەلگىلەرى بولىنە وتىرىپ، 3 جانە 4-بولىكتەرمەن تولىقتىرىلادى، سونداي- اق اسا ءىرى زالال كەلتىرگەن ارەكەتتەر ءۇشىن جاۋاپكەرشىلىك كوزدەلەدى»، - دەدى سەرىكقالي برەكەشيەۆ.
بۇعان دەيىن اتالمىش ۆەدومستۆو ۇلتتىق پاركتەردە 685 شاقىرىمدىق تۋريستىك مارشرۋت جاسالعانىن حابارلاعان بولاتىن.