ءۇندىستان مەن ورتالىق ازيا ەلدەرى اراسىندا تاۋار اينالىمى 3 ميلليارد دوللارعا جەتتى
بۇل تۋرالى ق ر پرەزيدەنتى قاسىم-جومارت توقايەۆ ايتتى، دەپ حابارلايدى قازاقپارات ءتىلشىسى.
«2020-جىلى ورتالىق ازيا مەن ءۇندىستان اراسىنداعى تاۋار اينالىمى 3 ميلليارد ا ق ش دوللارىنا جەتتى. بۇل رەتتە ساۋدا-ساتتىقتاعى قازاقستاننىڭ نەگىزگى ۇلەسى 80 پايىزدى قۇرادى. دەگەنمەن، قازىرگى كورسەتكىشتەر ءبىزدىڭ جيىنتىق ەكونوميكالىق الەۋەتىمىزگە ءالى دە سايكەس كەلمەي وتىر. مەنىڭشە، «ءۇندىستان - ورتالىق ازيا» سامميتى سىندى مۇنداي ديالوگ الاڭىنىڭ جۇمىسى ەلدەرىمىزدىڭ كەزەڭ-كەزەڭىمەن دامۋى ءۇشىن، جاڭا سىن-تەگەۋىرىندەر مەن قاتەرلەرگە ءتيىمدى جاۋاپ ازىرلەۋ ءۇشىن ءىس جۇزىندە پايداسى بار»، - دەپ اتاپ ءوتتى قاسىم-جومارت توقايەۆ «ءۇندىستان - ورتالىق ازيا» سامميتى بارىسىندا.
ق ر پرەزيدەنتى پىكىر الماسۋدىڭ وسىنداي بىرەگەي فورماتى مەملەكەتتەر اراسىنداعى ىنتىماقتاستىقتى ساپالى جاڭا دەڭگەيگە شىعارۋعا سەپ بولاتىندىعىن باسا ايتتى.
ايتا كەتەيىك، ءۇندىستان پرەمەر-ءمينيسترى نارەندرا مودي باستاماسىمەن تاريحتا العاش رەت ءوتىپ جاتقان سامميتكە ق ر پرەزيدەنتى قاسىم-جومارت توقايەۆتان بولەك وزبەكستان پرەزيدەنتى شاۆكات ميرزيەيەۆ، قىرعىزستان پرەزيدەنتى سادىر جاپپاروۆ، تۇرىكمەنستان پرەزيدەنتى گۋربانگۋلى بەردىمۇحامەدوۆ، تاجىكستان پرەزيدەنتى ەمومالي راحمون قاتىسۋدا.