ەلوردادا كوروناۆيرۋسپەن 3 مارتە اۋىرعاندار بار - ينفەكتسيونيست

نۇر- سۇلتان. قازاقپارات - جوعارى ساناتتى ينفەكسيونيست دارىگەر، مەديتسينا عىلىمدارىنىڭ كانديداتى ساۋلە اتىعايەۆا كوروناۆيرۋسپەن 3 مارتە اۋىرعان ناۋقاستاردىڭ بار ەكەنىن ايتتى، دەپ حابارلايدى قازاقپارات ءتىلشىسى.

«ارينە قايتالاپ ۆيرۋس جۇقتىرۋ جاعدايلارى كەزدەسىپ جاتىر. قازاقستاندا كوروناۆيرۋس پايدا بولعاننان بەرى، ياعني 2020 -جىلدىڭ ناۋرىز ايىنان بەرى 1,5 جىل ءوتتى. وسى كەزەڭدە ستاتسيونارعا كوروناۆيرۋسپەن ءۇشىنشى رەت اۋىرىپ ادامدار جۇگىنگەن جاعداي بولدى. ءار كەزەكتى سىرقات الدىڭعىسىنان الدەقايدا اۋىر جۇرگەن»، - دەگەن ينفەكتسيونيست قايتالاپ سىرقاتتانۋلاردىڭ ارالىعى 3-ايدان ءجيى بولمايتىنىن ايتتى.

«ۆيرۋستى قايتادان جۇقتىرعاندار نۇر- سۇلتان قالاسى بويىنشا كەمىندە 3-4-ايدان كەيىن اۋىرىپ وتىرعان. ەگەر ناۋقاس سىرقاتتانۋدىڭ ارالىعى 1 اي دەپ كورسەتسە، كوروناۆيرۋس سوزىلمالى سيپاتپەن ءوتۋى مۇمكىن نەمەسە ۆيرۋس جالعاسىپ، اسقىنعاندىقتان ەكى رەت اۋىرعانداي سەزىلۋى مۇمكىن»، - دەدى ساۋلە اتىعايەۆا ورتالىق كوممۋنيكاتسيالار قىزمەتىندە ءوتىپ جاتقان بريفينگىدە.