تاۋلىگىنە 3 مىڭ شاقىرتۋ: قاراعاندىلىقتار جەدەل جاردەمگە ءجيى جۇگىنە باستادى

None
None
قاراعاندى. قازاقپارات - قاراعاندىدا وبلىستىق جەدەل جاردەم قىزمەتىنە تاۋلىگىنە ءۇش مىڭعا دەيىن قوڭىراۋ كەلىپ تۇسەدى. مەديتسينالىق قىزمەتكەرلەرگە جۇكتەمە ارتتى.

ەپيدەميالىق جاعدايدىڭ كۇردەلىلىگىنە بايلانىستى قوسىمشا بريگادالار ىسكە قوسىلدى، دەپ حابارلايدى قازاقپارات ءتىلشىسى.

وبلىستىق جەدەل مەديتسينالىق جاردەم ستانسياسىنىڭ ديرەكتورى زۋلفيكار ءابىلقاسىموۆتىڭ ايتۋىنشا، قوڭىراۋلار سانى بىرنەشە ەسەگە ارتقان.


«بۇگىنگى تاڭدا ءبىز وبلىس بويىنشا تاۋلىگىنە 3 مىڭعا جۋىق شاقىرتۋدى تىركەيمىز. ونىڭ ىشىندە قاراعاندى بويىنشا 700-گە جۋىق ءوتىنىش ءتۇستى. قوسىمشا بريگادالار جۇمىس ىستەۋدە. جەدەل جاردەم فەلدشەرلەرى ءبىرىنشى، ەكىنشى جانە ءۇشىنشى ساناتتاعى شاقىرۋلارعا قىزمەت كورسەتەدى. ءتورتىنشى ساناتتاعى پاتسيەنتتەردى ەمحانا بريگادالارى ءوز موينىنا الادى. بۇل كوروناۆيرۋسپەن اۋىراتىن ناۋقاستار»، - دەيدى جەدەل جاردەم ستانسياسىنىڭ باسشىسى زۋلفيكار ءابىلقاسىموۆ.

2020 -جىلى جەدەل مەديتسينالىق جاردەم اۆتوكولىگى جاڭارتىلدى. جاڭا ماشينالار بارلىق قاجەتتىلىكتەرمەن تولىق جابدىقتالعان. جاقىندا عانا شاقىرتۋلارعا 150 بريگادا شىقتى. قازىر تاعى 26 قوسىلدى. كومەك تولىق كولەمدە كورسەتىلەدى.

«ءبىر جىل ىشىندە اتقارىلعان جۇمىسقا سۇيەنە وتىرىپ، جۇكتەمە جوعارى دەپ ايتا الامىن. ءبىر بريگادا تاۋلىگىنە 14-16 شاقىرتۋ الادى. بۇل وڭاي ەمەس، سەبەبى بارلىق جەردە ۋاقىت قاجەت. ءار قوڭىراۋ جەدەلدىكتى تالاپ ەتەدى. ناۋقاستار كىدىرىستەرگە شاعىمدانۋى مۇمكىن، ءبىراق ءبىرىنشى كەزەكتە بىزدە ءارقاشان كۇردەلى جاعدايلارعا باستى نازار اۋدارىلادى. بۇل جۇرەك- تامىر اۋرۋلارى، سودان كەيىن جوعارى تەمپەراتۋرا، سونىمەن قاتار كوروناۆيرۋستىق ينفەكتسيا جانە پنيەۆمونيا»، - دەيدى فەلدشەر وڭداس جۇماعاليەۆ.

جەدەل جاردەمنىڭ جەدەل ءبولىمى ءبىرىڭعاي ديسپەتچەرلىك قىزمەت قۇرامىندا بولادى. قوڭىراۋلار اعىنىنا بايلانىستى شتات بىرلىكتەرى دە ۇلعايتىلدى.

«قوڭىراۋلار بىركەلكى كەلىپ تۇسپەيدى. كوبىنەسە ادامدار كەشكى التىدان كەيىن قوڭىراۋ شالادى. ءبىر مەزەتتە كوپتەگەن وتىنىشتەر كەلىپ تۇسەتىن كەزدەر دە بولادى. تيىسىنشە، بارلىق شاقىرتۋلارعا دەر كەزىندە جاۋاپ بەرۋ مۇمكىن ەمەس. ءبىراق جەلى بەلسەندى تۇردە جۇمىس ىستەي بەرەدى. ياعني، ديسپەتچەر بوساعاننان كەيىن ول كەلەسى قوڭىراۋعا بىردەن جاۋاپ بەرەدى»، - دەپ تۇسىندىرەدى زۋلفيكار ءابىلقاسىموۆ.

دارىگەرلەر جاعدايعا تۇسىنىستىكپەن قاراۋدى سۇرايدى. بارلىق وتىنىشتەر مىندەتتى تۇردە قارالادى جانە نازاردان تىس قالمايدى.

«سوڭعى 10 كۇندە اۋرۋشاڭدىق وسۋدە. جەدەل جاردەم بريگادالارىنا جۇكتەمە ۇلكەن. نەگىزىنەن بالالار مەن 40 جاستان اسقان ادامدار اۋىرىپ جاتىر. كوبىنەسە پتر اناليزى وڭ ناتيجە كورسەتەدى. مۇنداي ناۋقاستاردى موبيلدى توپتار انىقتايدى»، - دەيدى وبلىستىق جەدەل جاردەم ستانسياسىنىڭ اعا كەزەكشى دارىگەرى ءۇمىتجان سۇلتانوۆا.

قاراعاندىلىقتاردىڭ نەگىزگى شاعىمدارى - جوتەل، ەنتىگۋ. بالالاردا ديارەيا، قۇسۋ ءجيى كەزدەسەدى. ۆيرۋستىق ينفەكسيا تەك جوعارعى تىنىس جولدارىنا عانا ەمەس، سونىمەن قاتار اسقازان- ىشەك جولدارىنا دا اسەر ەتەدى. جەدەل جاردەم قىزمەتكەرلەرى قاراعاندىلىقتاردى وزدەرىن جانە جاقىندارىن قورعاۋ ءۇشىن ۆاكسيناتسيادان وتۋگە شاقىرادى.

«ءبىزدىڭ قىزمەتكەرلەرىمىزدىڭ % 90- دان استامى ەكپە جاساتقان. بارلىعى وزدەرىن جاقسى سەزىنەدى»، - دەپ اتاپ ءوتتى زۋلفيكار ءابىلقاسىموۆ.

اۆتور: اگاتا مۋحامەدجانوۆا

سوڭعى جاڭالىقتار