بۇقتىرماداعى كوپىر قۇرىلىسى 3 جىلدا اياقتالادى

وسكەمەن. قازاقپارات - شىعىس قازاقستان وبلىسىندا بۇقتىرما سۋ قويماسى ارقىلى وتەتىن كوپىر قۇرىلىسى ءجۇرىپ جاتىر، دەپ حابارلايدى قازاقپارات ءتىلشىسى.

پرەزيدەنت قاسىم-جومارت توقايەۆتىڭ تاپسىرماسىمەن شىعىس قازاقستانداعى كۇرشىم مەن كوكپەكتى اۋداندارىن جالعايتىن «قىزىل تۋ» وتكەلىنە كوپىر سالىناتىنى بەلگىلى.

كوپىر قۇرىلىسى بويىنشا وتكەن كونكۋرستىڭ جەڭىمپازى بولىپ «وبلشىعىسجول» كومپانياسى اتانعان بولاتىن.

«بيىل قۇرىلىسقا رەسپۋبليكالىق بيۋجەتتەن 700 ميلليون تەڭگە، وبلىستىق بيۋجەتتەن 300 ميلليون تەڭگە ءبولىندى. سونىمەن قاتار رەسپۋبليكالىق بيۋجەتتەن تاعى بەس ميلليارد تەڭگە جۇمىلدىرۋعا ءوتىنىش جىبەرىلگەن. قازىرگى ۋاقىتتا كوپىر قۇرىلىسىنا دايىندىق جۇمىستارى جۇرگىزىلۋدە. ەڭ الدىمەن، جاعالاۋ تىرەكتەرىن ورناتۋ قاجەت. جوسپار بويىنشا تىرەك سانى تورتەۋ بولادى. نەگىزگى جۇمىستار كەزىندە قولدانىسقا ۋاقىتشا كوپىر سالىنادى»، - دەلىنگەن ش ق و جولاۋشىلار كولىگى جانە اۆتوموبيل جولدارى باسقارماسىنىڭ مالىمەتىندە.

كوپىر قۇرىلىسى جوباسىنىڭ جالپى قۇنى - 30 ميلليارد تەڭگە. جوسپار بويىنشا قۇرىلىس جۇمىستارى 3 جىلدا اياقتالادى.

ەستەرىڭىزگە سالا كەتسەك، وسىعان دەيىن كوپىر قۇرىلىسىن جۇرگىزەتىن جۇمىسشىلار ءۇشىن 250 ورىندىق جاتاقحانا قالاشىعىنىڭ قۇرىلىسى باستالعانىن حابارلاعان بولاتىنبىز. قازىردە عيماراتتىڭ قاڭقاسى قالانىپ قويدى.