12:16, 13 - اقپان 2021 | GMT +6
مەركىگە جاقىن ماڭدا جۇرگەن 3 قار بارىسى ۆيدەوعا ءتۇسىپ قالدى
تاراز. قازاقپارات - جامبىل وبلىسىندا تاۋلى ايماقتا قار بارىستارى كامەراعا ءتۇسىپ قالدى، دەپ حابارلايدى قازاقپارات ءتىلشىسى.
وبلىس اكىمدىگىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ حابارلاۋىنشا، بۇل جولعى قار بارىستارى قىرعىز الاتاۋىنىڭ مەركى اۋدانىنا جاقىن بولىگىندە بايقالعان.
ۆيدەودا 3- قار بارىسىنىڭ قاۋىپتەن الىس، الاڭسىز جۇرگەندەرى انىق كورىنەدى. مەركى ورمان شارۋاشىلىعى ديرەكتورىنىڭ ورىنباسارى ازات ەرەنسىزدىڭ ايتۋىنشا، ورمان شارۋاشىلىعىنىڭ اۋماعىندا بارىستار ءجيى پايدا بولا باستاعاندىقتان 11 فوتوتۇزاق ورناتىلىپتى. ولاردى ارنايى ەكى مامان باقىلايدى.
ول عانا ەمەس، الداعى ۋاقىتتا ورمان شارۋاشىلىعى «قىزىل كىتاپقا» ەنگەن جانۋارلاردى بارىنشا باقىلاۋ ءۇشىن SMART كامەرالارىن قولدانباقشى. بۇعان دەيىن مەركى ورمان شارۋاشىلىعىندا ءبىر جارىم جىل ىشىندە فوتوتۇزاققا سەگىز قار بارىسى تۇسكەندىگى تۋرالى جازىلعان بولاتىن.