اقتوبەدە قازاقستاننىڭ 3 دۇركىن چەمپيونى داۋلەت حايروللانىڭ ەسىمى ۇلىقتالدى

اقتوبە. قازاقپارات - اقتوبە قالاسىنداعى سپورت كلۋبىنا كاراتەدەن قازاقستان كۋبوگىنىڭ ءۇش دۇركىن چەمپيونى مارقۇم داۋلەت حايروللانىڭ ەسىمى بەرىلدى، دەپ حابارلايدى قازاقپارات ءتىلشىسى.

داۋلەت حايروللا تاياۋدا عانا كىسى قولىنان قازا تاپتى. اقتوبە وبلىستىق پوليتسيا دەپارتامەنتى جاستار جينالىپ، تۋعان كۇن تويلاماق بولعان كەزدە ەكى جىگىت جانجالداسىپ، ءبىرى ەكىنشىسىن اتىپ تاستاعانىن حابارلادى.

قازىر وسى وقيعاعا قاتىستى قىلمىستىق ءىس قوزعالدى، كۇدىكتى ۇستالدى. ال بۇگىن كاراتەدەن قازاقستان كۋبوگىنىڭ، ازيا كۋبوگىنىڭ يەگەرى، قازاقستان چەمپيوناتىنىڭ جەڭىمپازى جاتتىققان سپورت كلۋبىنا ونىڭ ەسىمى بەرىلدى.

بۇل وسى سپورت كلۋب تاربيەلەنۋشىلەرى مەن اتا-انالاردىڭ، جاتتىقتىرۋشىلار مەن كاراتە فەدەراتسياسىنىڭ وبلىستىق فيليالىنان تۇسكەن ۇسىنىس.

«ونىڭ ماقساتى - ەۋروپا، الەمدى باعىندىرۋ ەدى. جاس ءومىرى ءۇزىلىپ كەتتى. ونىڭ ءىسىن شاكىرتتەرى، ونىڭ كومانداسى جالعاستىرادى دەپ ويلايمىن. بارلىق اتا-انالارعا «بالالارىڭىزعا ساق بولىڭىزدار» دەپ ايتقىم كەلەدى. ال جاستارعا «سپورتتى سۇيىڭدەر» دەيمىن. بىرگە بولسا، قارۋ قولدانباسا دەپ تىلەيمىن»، - دەدى داۋلەت حايروللانىڭ اكەسى تولەۋباي جاقانوۆ.

ايتا كەتەيىك، سپورت كلۋبىندا 100 دەن استام بالا جاتتىعىپ ءجۇر.