شەشىم قابىلداۋعا كومەكتەسەتىن 3 ءتاسىل
سەبەبى شەشىم قابىلداپ، تاڭداۋ جاساي الماۋ قيپاقتاۋ اركىمنىڭ باسىنان وتكەن نارسە. ادام كەيىن بۇدان دا ماڭىزدى تاڭداۋ جاساۋى كەرەك بولسا، پروتسەسس اپتاعا، ايعا سوزىلىپ كەتۋى مۇمكىن. نازارىڭىزعا بيزنەس- كوۋچ ەنني ديۋكتىڭ «شەشىم قابىلداۋعا كومەكتەسەتىن 3 ءتاسىل» دەگەن جازباسىن اۋدارىپ ۇسىنامىز.
باقىت تەستى
باقىت تەستى - ءسىزدىڭ قازىرگى تاڭداۋىڭىزدىڭ ماڭىزىن انىقتاۋعا كومەكتەسەتىن ءتاسىل.
ءبىز رەستوراندا كەشكى اسقا قانداي تاعام ىشەرىمىزدى بىلمەي وتىرامىز. اقىرى بىرەۋىن تاڭدايسىز، داياشى تاعامدى اكەلەدى. ول وتە ءدامدى بولۋى مۇمكىن، جاي عانا ءدامدى بولۋى مۇمكىن نەمەسە سىزگە ۇناماي قالۋى دا مۇمكىن.
الايدا بۇل تاعام ءسىزدىڭ ءبىر جىلدان كەيىن باقىتتى بولۋىڭىزعا اسەر ەتە المايدى. ءسىز ونى ءبىر ايدان كەيىن ەسىڭىزگە دە تۇسىرە الماۋىڭىز مۇمكىن. سول سياقتى Netflix-تەن قىزىقسىز فيلم كورگەنىڭىز، ىڭعايسىز شالبار ساتىپ العانىڭىز دا ءسىزدىڭ ومىردە باقىتتى بولۋىڭىزعا قاتتى اسەر ەتە المايدى.
سوندىقتان نە كورەمىن، نە كيەمىن دەگەن سياقتى باقىتتى بولۋعا اسەر ەتە المايتىن تاڭداۋ جاساۋدىڭ اسا ماڭىزى جوق.
ءبىر نۇسقامەن تەكسەرۋ
«تاڭداۋ پارادوكسى» دەگەن كىتاپتا بارري شۆارتس بىلاي دەيدى: «تاڭدايتىن نارسە كوپ بولعان سايىن سىزگە جارايتىن نارسە ءبىر ەمەس بىرنەشە بولىپ كەتەدى. سايكەسىنشە تاڭداۋ جاساۋعا دا ۋاقىت كوبىرەك كەتەدى».
مۇنىڭ پارادوكسى سول - نۇسقا كوپ بولعان سايىن قاۋىپ تە ەسەلەنە بەرەدى.
ەگەر دەمالىستى پاريج نەمەسە بالىق كونسەرۆىلەرىن جاسايتىن فابريكا ماڭىندا وتكىزۋ دەگەن تاڭداۋ تۇرسا، بۇعان قاتتى قينالا قويماسپىز. ال ەگەر پاريج، ريم، امستەردام، سانتوريني نەمەسە ماچۋ- پيكچۋ دەگەن نۇسقالار بولسا، تىعىرىققا تىرەلۋىمىز مۇمكىن.
تىعىرىقتان شىعۋ ءۇشىن ءبىر نۇسقامەن تەكسەرۋ ءتاسىلىن تەكسەرۋگە بولادى. ءار نۇسقانى جەكە- جەكە قاراستىرىپ، نۇسقالاردى تەكسەرىپ، بىلاي سۇراقتار قويىڭىز:
ەگەر بۇل مەندە بار جالعىز نۇسقا بولسا؛
ەگەر بۇل دەمالىستا مەن بارا الاتىن جالعىز جەر بولسا؛
ەگەر بۇل مەن ساتىپ الا الاتىن جالعىز ءۇي بولسا؛
ەگەر بۇل ماعان ۇسىنىلعان جالعىز جۇمىس بولسا ماعان ءلاززات سىيلاي الا ما؟
«جالعىز نۇسقامەن» تەكسەرگەندە شەشىم قابىلداۋعا كەدەرگى بولعان نارسەلەر انىقتالا باستايدى.
تاڭداۋدان باس تارتۋ
ءوز تاڭداۋىڭدى وزگەرتۋدەن قورىقپاعان ءجون. بۇعان سالقىنقاندى قاراپ ۇيرەنۋ كەرەك. سەبەبى كوپشىلىك تاڭداۋدى وزگەرتۋدى، ودان باس تارتۋدى ويلامايدى دا.
مىسالى ادامدار ۋنيۆەرسيتەت تاڭداعاندا وقۋ ورنى 4 جىلدىڭ قالاي وتەتىنىنە قاتتى اسەر ەتەدى دەپ ويلايدى. ءبىراق %37 ستۋدەنتتەر كەيىن باسقا ۋنيۆەرسيتەتتەرگە اۋىسىپ كەتەدى.
massaget.kz