نۇر-سۇلتاندا جارىلىستان زارداپ شەككەن 3 ادام جانساقتاۋ بولىمىندە جاتىر
«گاز باللوندارىنىڭ جارىلۋىنان جاراقات العان 23 ادام №1- جانە №2-كوپبەيىندى قالالىق اۋرۋحاناعا جاتقىزىلدى. زارداپ شەككەن تاعى 11 ادام جەڭىل جاراقات العان. ولار امبۋلاتورلى ەمدەۋگە جىبەرىلدى» دەدى باسقارمانىڭ باسپا ءسوز قىزمەتىنەن.
پاتسيەنتتەردىڭ كوبى ءتۇرلى دارەجەدەگى تەرميالىق كۇيىكپەن جەتكىزىلگەن. كەيبىرى ورتا دارەجەدە گازبەن ۋلانعان. ءبىر پاتسيەنت جامباس سۇيەگىنىڭ جابىق سىنىعىمەن تراۆماتولوگيا بولىمشەسىندە جاتىر. قالعاندارى - №1-قالالىق اۋرۋحانانىڭ كومبۋستيولوگيا بولىمشەسىندە.
«دەنساۋلىق جاعدايى ورتاشا، اسقىنۋ بايقالمايدى. 3 ادام جانساقتاۋ بولىمىندە جاتىر» دەلىنگەن حابارلامادا.
ايتا كەتەيىك، كەشە ەلوردادا ءدامحانالاردىڭ بىرىندە گاز باللونى جارىلىپ، ءبىر ادام قازا تاپتى. ەلوردا اۋرۋحانالارىندا 23 ادام ەم الىپ جاتقانى حابارلانعان بولاتىن. وسى وقيعادان كەيىن قازا تاپقان قىزدىڭ وتباسىنا كومەك كورسەتىلەتىنىن ايتقان نۇر-سۇلتان اكىمى التاي كولگىنوۆ توتەنشە جاعدايلار جانە پوليتسيا دەپارتامەنتتەرىنە قالاداعى باسقا دا قوعامدىق تاماقتانۋ نىساندارىندا ءورت قاۋىپسىزدىگى ەرەجەلەرىنىڭ ساقتالۋىن تەكسەرۋدى تاپسىرعان بولاتىن.