سولتۇستىك قازاقستان وبلىسىندا براكونەرلەر 3 اققۋدى اتىپ العان
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وبلىس اۋماعىندا 2397 كول بولسا، سونىڭ 332- ءسى جالعا بەرىلگەن. بۇل كولدەردە رۇقسات قۇجاتتارى بولعان جاعدايدا عانا بالىق اۋلاۋعا بولادى.
«بالىقشىلار اراسىندا ءجيى كەزدەسەتىن زاڭ بۇزۋشىلىق - رۇقسات قۇجاتتارىنىڭ بولماۋى. ال اڭشىلار اراسىندا قارۋدى تاسىمالداۋ ەرەجەسىنە ءمان بەرمەيتىندەر بارشىلىق. ياعني ورمانعا تىس قاپسىز نەمەسە جينالعان كۇيىندە جەتكىزەدى. ورماندا دەمالعاندى ۇناتاتىندارعا بيىل اڭعا شىقپاس بۇرىن جاڭا ەرەجەمەن تانىسۋعا كەڭەس بەرەمىن. وبلىستىق ورمان شارۋاشىلىعى جانە جانۋارلار الەمى ينسپەكسياسى باسشىسىنىڭ بۇيرىعىندا بارلىعى كورسەتىلگەن»، - دەيدى س ق و پ د ج پ ق ب تابيعاتتى قورعاۋ پوليتسياسى توبىنىڭ اعا ينسپەكتورى اسحات قوجابايەۆ.
بۇيرىققا سايكەس قازاقستاننىڭ قىزىل كىتابىنا ەنبەگەن جانۋارلار مەن قۇستاردى اتۋعا بولادى. اڭشىلىق ماۋسىمنىڭ باستالۋ مەرزىمىمەن جانە ەرەجەسىمەن ايماقتىق ينسپەكسيانىڭ Facebook-پاراقشاسىندا تانىسۋعا بولادى. پوليتسەيلەر تەك رۇقسات قۇجات بولعان جاعدايدا جانە اڭشىلىق شارۋاشىلىقتاردىڭ اۋماعىندا عانا اڭشىلىق قۇرۋعا بولاتىنىن ەسكەرتەدى.
س ق و- دا 37 اڭشىلىق شارۋاشىلىعى بار. ال 6 قورىقتا جانە «كوكشەتاۋ» ۇلتتىق پاركىنىڭ اۋماعىندا اڭ- قۇس اتۋعا تىيىم سالىنعان. جالپى جىل باسىنان ءتارتىپ ساقشىلارى تابيعاتتى قورعاۋ زاڭناماسىن بۇزۋدىڭ 658 دەرەگىن انىقتادى. ونىڭ 378- ءى جانۋارلار، 226 - بالىق جانە 9-ى وسىمدىك الەمىنە قاتىستى. ەكولوگيالىق زاڭبۇزۋشىلىققا قاتىستى 5 قىلمىستىق ءىس سوتقا جىبەرىلسە، 8- ءى بويىنشا ءىس وندىرىستە.
تابيعاتقا كەلگەن جالپى شىعىن مولشەرى 13 ميلليون تەڭگەدەن اسادى. براكونەرلەردەن 21 ءسىبىر ەلىگىنىڭ، 2 مارالدىڭ، 3 اققۋدىڭ ەتى الىندى. قاردا جۇرەتىن 3 تەحنيكا مەن 8 قارۋ- جاراق تاركىلەندى.
اۆتور: اقەركە داۋرەنبەك قىزى