ابايدىڭ 3 تومدىق اكادەميالىق تانىمدىق جيناعى جارىققا شىعادى

None
None
نۇر- سۇلتان. قازاقپارات - ابايدىڭ 3 تومدىق اكادەميالىق تانىمدىق جيناعى جارىققا شىعادى. بۇل تۋرالى قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت ايتتى، دەپ حابارلايدى قازاقپارات ءتىلشىسى.

«ادامزاتتىڭ العاشقى ۇستازى اريستوتەلدەن بەرگى بۇكىل ۇستازداردىڭ، كلاسسيكتەردىڭ قاي- قايسىمەن دە ابايدى تەرەزەسى تەڭ تۇراتىن دانىشپان دەپ ەسەپتەيمىز. قازاقستاننىڭ جازۋشىلار وداعى ابايدىڭ 175 جىلدىق مەرەيتويىنا وراي اقىننىڭ پوەزيالىق كۇنتىزبەسىن شىعاردى. سونىمەن قاتار ينتەراكتيۆتى كىتابىن دايىندادىق. ول قازىر وندىرىستە. ينتەراكتيۆتى كىتاپتا ابايدىڭ ولەڭدەرى، قارا سوزدەرى، اندەرى، كۇيلەرى بارلىعى دىبىستالىپ ورىندالادى. ونى قازاق راديوسىنىڭ ۇزدىك ديكتورلارى، قازاقتىڭ ارعى- بەرگى عاجايىپ انشىلەرى ورىندايدى. تەحنولوگيانىڭ وزىق زامانىندا مۇنداي كىتاپ تاپتىرمايتىن دۇنيە سانالادى. ونى فلەشكا، ديسكى تۇرىندە تاراتا بەرۋگە بولادى»، - دەدى ۇلىقبەك ەسداۋلەت.

سونىمەن قاتار ول بۇكىل قارجىنىڭ كوروناۆيرۋسپەن كۇرەسكە جۇمسالۋىنا بايلانىستى الماتى قالاسىنىڭ ءىس- شارالار جوسپارىنا كىرگەنىمەن ىسكە اسپاي تۇرعان ءبىر شارا بار ەكەندىگىن ايتتى.

«ول جازۋشىلار وداعىنىڭ الدىنا ابايدىڭ كەۋدە ءمۇسىنىن ورناتۋ بولاتىن. ودان باسقا ابايدىڭ شىعارمالارى 10 تىلگە اۋدارىلىپ، قازىر جارىققا شىعىپ جاتىر. مۇنان بولەك م. اۋەزوۆ اتىنداعى ادەبيەت جانە ونەر ينستيتۋتى دايىنداعان ابايدىڭ 3 تومدىق اكادەميالىق تانىمدىق جيناعى جارىققا شىعادى. وعان ەلىمىزدىڭ پرەزيدەنتىنىڭ ءوزى باس- كوز بولىپ، باقىلاۋىنا الىپ وتىر»، - دەدى جازۋشىلار وداعىنىڭ ءتوراعاسى.

ايتا كەتەيىك، قازاقتىڭ ۇلى اقىنى ابايدىڭ 175 جىلدىق مەرەيتويىنا وراي ق ر مەملەكەتتىك حاتشىسى قىرىمبەك كوشەربايەۆ باستاعان ءبىر توپ مەملەكەت جانە قوعام قايراتكەرى ەلورداداعى اباي ەسكەرتكىشىنە سالتاناتتى جاعدايدا گۇل شوقتارىن قويعان ەدى.

ەستەرىڭىزدە بولسا تاياۋدا قازاقستان ۇكىمەتىنىڭ قاۋلىسىمەن 10- تامىز اباي كۇنى بولىپ بەلگىلەندى.

اۆتور: مارلان جيەمباي

سوڭعى جاڭالىقتار