جاستار اراسىندا كوروناۆيرۋس جۇقتىرۋ 3 ەسە ارتتى – د د ۇ

نۇر-سۇلتان. قازاقپارات - دۇنيەجۇزىلىك دەنساۋلىق ساقتاۋ ۇيىمى (د د ۇ) سوڭعى 5 ايدا جاستار اراسىندا كوروناۆيرۋس جۇقتىرۋ 3 ەسە ارتقانىن مالىمدەدى، - دەپ حابارلايدى Reuters اگەنتتىگى.

24-اقپان مەن 12-شىلدە ارالىعىندا الەمدە كوروناۆيرۋس ينفەكسياسىن جۇقتىرۋدىڭ 6 ميلليون دەرەگى تىركەلگەن. ونىڭ ىشىندە جاستار اراسىندا COVID-19 جۇقتىرۋ 15 پايىزعا وسكەن. وسىعان دەيىن بۇل كورسەتكىش 4,5 پايىز بولعان. د د ۇ جاستارعا 15 پەن 24 جاستاعى ادامداردى جاتقىزادى.

گەرمانيا، يسپانيا، فرانسيا جانە جاپونيا ەلدەرىندە كوروناۆيرۋس جۇقتىرعاندار اراسىندا جاستار وتە كوپ.

«جاستار ماسكا تاعۋ جانە اراقاشىقتىقتى ساقتاۋ تالابىن ەلەمەيدى. ساياحات جاساۋ دا COVID-19 جۇقتىرۋ جانە تارالۋ قاۋپىن ارتتىرادى»، - دەيدى ا ق ش-تاعى Johns Hopkins گوسپيتالىنىڭ باس مەدبيكەسى نەيسا ەرنست.

ونىڭ ايتۋىنشا، جاستار جاعاجايعا دەمالۋعا، كلۋبتارعا جانە دۇكەنگە ءجيى بارادى.

سونداي-اق، دۇنيەجۇزىلىك دەنساۋلىق ساقتاۋ ۇيىمى كوروناۆيرۋس جۇقتىرعان بالالار سانىنىڭ وسۋىنە الاڭداۋشىلىق ءبىلدىردى. وسى جىلدىڭ بەس ايىندا 5 پەن 14 جاس اراسىنداعى بالالاردىڭ COVID-19 جۇقتىرۋ دەرەگى 4,6 پايىزعا وسكەن.

ساراپشىلار جاڭا وقۋ جىلىندا كوروناۆيرۋس جۇقتىرعان وقۋشىلاردىڭ سانى ءوسۋى مۇمكىن دەگەن بولجام جاساپ وتىر.

ساراپشىلار جاستارعا ماسكا تاعىپ، اراقاشىقتىقتى ساقتاپ، ادام كوپ جينالاتىن جەرگە بارماۋعا كەڭەس بەردى.