ەلوردادا 3-تامىزدان كەيىن قانداي نىسانداردىڭ جۇمىسىنا تىيىم سالىنادى
سوندىقتان كەي نىسانداردىڭ جۇمىسى قايتا جاندانبايدى، دەپ حابارلايدى قازاقپارات.
قالانىڭ باس مەملەكەتتىك سانيتار دارىگەرىنىڭ قاۋلىسىنا سايكەس، ايماقتار اراسىنداعى جولاۋشىلار اۆتوبۋسىنىڭ قوزعالىسى ازىرگە توقتاي تۇرادى.
سونىمەن قاتار، ساۋدا- ويىن- ساۋىق ورتالىقتارىنىڭ، ساۋدا ۇيلەرىنىڭ، ساۋدا ورتالىقتارىنىڭ، جابىق بازارلاردىڭ جۇمىسىنا تىيىم سالىنادى. تەك ونىڭ ىشىندەگى ءدارىحانالار مەن تاماق ونىمدەرىن وتكىزەتىن شاعىن ماركەتتەر، سۋپەرماركەتتەر مەن گيپەرماركەتتەر جۇمىس جانە دەمالىس كۇندەرى ساعات 10.00-دەن 21.00-گە دەيىن ىستەيدى.
ودان بولەك، قالانىڭ بارلىق سپورت ۇيىمدارىندا وقۋ- جاتتىعۋ ساباقتارىنا، جيىندارعا، جارىسقا قاتىسۋعا جانە وتكىزۋگە، ءبىلىم ورتالىقتارىنىڭ، بالالاردى دامىتۋ ورتالىقتارىنىڭ، ۇيىرمەلەردىڭ، بالالار مەن ەرەسەكتەرگە ارنالعان كۋرستاردىڭ جۇمىسىنا شەكتەۋ قويىلدى. عيماراتتا ورنالاسقان قوعامدىق تاماقتانۋ وبەكتىلەرىنىڭ جۇمىسىن ورنالاسقان جەرىنە قاراماستان تاماقتى سىرتقا شىعارۋ نەمەسە جەتكىزۋگە اۋىستىرا وتىرىپ، جۇمىس كەستەسىن ساعات 10.00 دەن 22.00 گە دەيىن بەلگىلەي وتىرىپ تىيىم سالۋ، جابىق ازىق- تۇلىك جانە ازىق- تۇلىك ساتپايتىن بازارلاردىڭ جۇمىسىن توقتاتۋ قاراستىرىلعان.
كوسمەتيكالىق جانە كوسمەتولوگيالىق قىزمەتتەر، مانيكيۋر جانە پەديكيۋر قىزمەتتەرىن كورسەتەتىن سپا- ورتالىقتار، ترەناجەر زالى، فيتنەس- ورتالىقتار، سپورت- ساۋىقتىرۋ ورتالىقتارى، باسسەيندەر، اكۆاپاركتەر، جاعاجايلار، قوعامدىق مونشالار، ساۋنالار، سۇلۋلىق سالوندارى مەن شاشتارازدار، ورتالىقتار مەن سالوندار ۋاقىتشا ىستەمەيدى.
اتتراكسيونداردىڭ بارلىق ءتۇرى، ونىڭ ىشىندە اشىق اۋادا، تۇرعىن ۇيلەردىڭ اۋلاسىندا جانە جالپى پايدالانۋ ورىندارىندا ورنالاسقان بالالاردىڭ ويىن الاڭدارىنىڭ جۇمىسىنا تىيىم سالىندى. قالا ساياباقتارىندا، جاعالاۋدا، سكۆەرلەردە بالالار مەن ەرەسەكتەرگە ارنالعان قۇرالدار (ەلەكتروموبيل، قۇلايتىن اۆتوموبيل، ساموكات، گيروسكۋتەر) جالعا بەرىلمەيدى.
كوڭىل كوتەرۋ مەكەمەلەرىنىڭ (بيليارد، كاراوكە، بوۋلينگ- ورتالىقتار، كومپيۋتەرلىك كلۋب، تۇنگى كلۋب) جۇمىسى توقتايدى. سونداي-اق بارلىق مادەنيەت وبەكتىلەرىنىڭ (تەاترلار، كونسەرت زالدارى، مۇراجاي، كورمە) جانە قالانىڭ بارلىق سپورت نىساندارىنىڭ جۇمىسىنا تىيىم سالىنادى. دىنگە سەنۋشىلەردىڭ مەشىت، شىركەۋ، سوبور نەمەسە سيناگوگاعا بارۋىنا بولمايدى. بۋكمەكەر كەڭسەلەرى دە ىستەمەيدى.