ماسكتىڭ كوۋچى مي جۇمىسىن جاقسارتۋدىڭ 3 ءتاسىلىن ۇسىندى

نۇر-سۇلتان. قازاقپارات - Tesla جانە Space X كومپانياسىنىڭ نەگىزىن قالاۋشى يلون ماسك ءوزىنىڭ قول استىندا جۇمىس ىستەيتىن ادامدارعا جول سىلتەسىن دەگەن ماقساتپەن تانىمال كوۋچ دجيم كۆيكتىڭ ارنايى لەكتسياسىن تىڭداتقان.

وندا مي جۇمىسىن جاقسارتۋ تۋرالى، اسىرەسە، كولەمدى ءماتىندى وقۋ، ماڭىزدى اقپاراتتى ەسكە ۇزاق ساقتاپ قالۋ سىندى نارسەلەرگە كوپ كوڭىل بولگەن. تومەندە كورسەتىلگەن بۇل 3 ءتاسىل قاراپايىم بولسا دا، وتە ءتيىمدى.

1. نەگاتيۆ ويدان ارىلۋ

كۆيك بەرگەن كەڭەستە «اۆتوماتتى نەگاتيۆ ويلاردان» (Automatic Negative Thoughts, ANT) ارىلۋعا نازار اۋدارادى. ونداي ويلارعا ءوز- ءوزىن جەگىدەي جەۋ، وزگەلەردى كىنالاۋ، ءالى باستالماعان ءىستىڭ ناتيجەسىز بولاتىنىنا الدىن الا سەنۋ جاتادى. سونداي- اق مۇنداي نەگاتيۆ ويعا ادامنىڭ ءوز مۇمكىندىگىن جاسىمەن شەكتەۋىن دە قوسۋعا بولادى (مىسالى، «مەن جاڭا دۇنيە ۇيرەنۋ ءۇشىن تىم كارىمىن» دەگەنگە ساياتىن ويلار). كۆيك مۇنداي ويدى بىردەن جويىپ وتىرۋ كەرەگىن ايتادى.

2. «ميعا ارنالعان قورەك» تۇتىنۋ

«ميعا ارنالعان قورەك» تۇتىنۋ دەگەن كەڭەسكە دەلسال قارايتىندار كوپ، ءبىراق ول وتە ماڭىزدى قادام. كوۋچ ونىڭ كەم دەگەندە كۇنىنە 1 پورتسياسىن قابىلداۋعا شاقىرادى. كۆيك پىكىرى بويىنشا، توپ-10 ۇزدىك ءونىم: * اۆوكادو * بۇلدىرگەن * بروككولي * جۇمىرتقا * ءشوپ تۇرلەرى * بالىق *كۋركۋما * گرەك جاڭعاعى *قارا شوكولاد * سۋ.

3. كوپ وقۋ

كوپ اقپارات پەن ءبىلىم الۋ ءۇشىن ءبىراز وقۋ كەرەك. جىلدام وقۋ ادەتىن قالىپتاستىرۋ جولىندا بۇل ىسكە كۇنىنە كەم دەگەندە 10 مينۋت ۋاقىت ءبولىپ، ونى ادەتكە اينالدىرۋعا كەڭەس بەرەدى. سونداي- اق، ول وقىپ جاتقان جولدى ساۋساقپەن سىرعىتىپ وتىرۋ وقۋ پروتسەسىنىڭ ونىمدىلىگىن ارتتىرادى دەپ ەسەپتەيدى. «ءبىر عانا كىتاپ وقىعان ادامنىڭ ءوزى ادامزاتتىڭ ونداعان جىلدار بويى جيناعان تاجىريبەسىنەن حاباردار بولا الادى»، - دەيدى كۆيك.

Massaget.kz