بيىل قولجەتىمدى تۇرعىن ءۇي قۇرىلىسىنىڭ كولەمى 3 ەسە ارتادى - التاي كولگىنوۆ

نۇر-سۇلتان. قازاقپارات - ەلوردا اكىمدىگىندە قولجەتىمدى جانە كوممەرتسيالىق تۇرعىن ءۇي، الەۋمەتتىك جانە مادەني نىساندار قۇرىلىسى تالقىلاندى، دەپ حابارلايدى قازاقپارات قالا اكىمدىگىنىڭ رەسمي سايتىنا سىلتەمە جاساپ.

التاي كولگىنوۆ جەتەكشى قۇرىلىس كومپانيالارىنىڭ وكىلدەرىمەن كەزدەستى. كەزدەسۋدە قۇرىلىس سالۋشىلار ءبىرقاتار ۇسىنىستارىن ايتتى. قالا اكىمدىگى كوتەرىلگەن ماسەلەلەردى جۇمىسقا الدى.

ەلوردا اكىمى التاي كولگىنوۆ قۇرىلىس جۇمىستارىنىڭ ساپاسىنا ءتيىستى كوڭىل ءبولۋ قاجەتتىگىن اتاپ ءوتتى.

«تۇرعىن ءۇي مەن الەۋمەتتىك نىسانداردى سالۋ - ءبىز ءۇشىن باستى مىندەت. بۇل ىستە اكىمدىك بارىنشا قولداۋ كورسەتىپ كەلەدى، كورسەتەدى دە. الايدا سىزدەردىڭ تاراپتان دا بارلىق قاجەتتى تالاپتار ورىندالۋى ءتيىس. ولاردىڭ قاتارىنا قۇرىلىس ساپاسى، جۇمىس كەزىندەگى قاۋىپسىزدىكتى قامتاماسىز ەتۋ، قىزمەتكەرلەرگە ۋاقىتىلى جالاقى تولەۋ جاتادى. مەملەكەت باسشىسىنىڭ تاپسىرماسىنا سايكەس بيىل قولجەتىمدى تۇرعىن ءۇي قۇرىلىسىنىڭ كولەمى ءۇش ەسە ارتادى. بىرلەسە قۇرىلىس قارقىنىن ارتتىرۋىمىز قاجەت»، - دەدى قالا اكىمى التاي كولگىنوۆ.

ەلوردادا ءبىرىڭعاي ديزاين-كود قابىلداندى. ديزاين-كود ستيليستيكالىق تۇرعىدا ءبىرىڭعاي، جايلى ءارى قاۋىپسىز قالالىق ورتانى قالىپتاستىرۋ ماقساتىندا قابىلدانعان ءبىرقاتار ەرەجەلەر مەن ۇسىنىمداردان تۇرادى. ديزاين-كود عيماراتتاردىڭ قاسبەت ەلەمەنتتەرىنە جانە كوشە-جول كەڭىستىگىنە باعىتتالعان.

سونداي-اق، شاعىن ساۋلەت نىساندارىن، اباتتاندىرۋدى، ارلەۋ ماتەريالدارىن قولدانۋدى، تۇستىك شەشىمدەردى، جارنامالىق قۇرىلىمداردىڭ مولشەرىن ەسكەرە وتىرىپ، عيماراتتاردىڭ قاسبەتتىك بولىگىنەن كوشە-جول جەلىسىنىڭ قازىرگى جاعدايىن تۇزەتۋ قاراستىرىلعان.