لوزاننادا 3-جاس وسپىرىمدەر قىسقى وليمپياداسى باستالدى

None
None
نۇر-سۇلتان. قازاقپارات - شۆەيتساريانىڭ لوزاننا قالاسىنداعى «Malley» مۇز سارايىندا 3-جاس وسپىرىمدەر قىسقى وليمپياداسىنىڭ اشىلۋ سالتاناتى وتۋدە.

سالتاناتتى شەرۋگە قازاقستان ۇلتتىق قۇراماسى دا قاتىستى، دەپ حابارلايدى Olympic.kz.

جاس وسپىرىمدەر وليمپياداسىنىڭ اشىلۋ سالتاناتىنا شۆەيتسارياعا اتتانعان قازاقستاندىق سپورتشىلاردىڭ العاشقى لەگى قاتىستى. ەلىمىزدىڭ كوك بايراعىن تاۋ شاڭعىسىنان سىنعا تۇسكەن ۆلاديسلاۆ شلەموۆ كوتەرىپ شىقتى.

جاس سپورتشى مۇنداي مارتەبەگە يە بولعانى ءۇشىن قۋانىشتى ەكەنىن جاسىرمادى.

«ەلىمىزدىڭ كوك تۋىن كوتەرىپ شىعۋ ۇلكەن ابىروي. كەۋدەمدى ماقتانىش سەزىمى كەرنەپ تۇر. ءبىر جاعىنان جاۋاپكەرشىلىك تە ارتۋدا. شىنىن ايتقاندا، ازداپ قوبالجىپ تۇرمىن. قازاقستاننىڭ بايراعىن مۇنداي ءىرى باسەكەدە كوتەرىپ شىعۋ مىندەتىن العاش رەت ورىندايىن دەپ تۇرمىن.

بۇرىن-سوڭدى ەلىمىزدىڭ تۋىن الىپ شىعۋ مارتەبەسى بۇيىرماعان. اشىلۋ سالتاناتى اياقتالعان سوڭ، جارىسقا دايىندالامىز. جاقسىلاپ ونەر كورسەتۋدى ماقسات ەتتىك»، - دەيدى ۆلاديسلاۆ.

ايتا كەتەلىك، تاۋ شاڭعىسىنان سىنعا تۇسەتىن سپورتشىلار وليمپيادادا العاشقىلاردىڭ ءبىرى بولىپ باق سىنايدى. ۆلاديسلاۆ شلەموۆ پەن الەكساندرا ترويتسكايا 10- قاڭتار كۇنى سۋپەرگيگانت باعدارلاماسى بويىنشا سىنعا تۇسەدى.

سوڭعى جاڭالىقتار