ءابىش كەكىلبايەۆتىڭ ءومىرى مەن شىعارماشىلىعىنا ارنالعان ەنتسيكلوپەديانىڭ 3-تومى جارىق كوردى
جيىن بارىسىندا فيلولوگيا عىلىمدارىنىڭ دوكتورى، پروفەسسور «ارىس» باسپاسىنىڭ ديرەكتورى، ەنتسيكلوپەديا اۆتورى عاريفوللا انەس ءوز پىكىرىن ءبىلدىردى.
«الدىمەن بۇگىن تۇساۋى كەسىلىپ جاتقان بيبليوگرافيا جايلى ايتۋىمىز كەرەك. بۇل ۇلتتىق كىتاپحانا بيبليوگرافياسىندا دايىندالدى. ەڭ العاش ەنتسيكلوپەديا ءۇش توم بولىپ جارىق كوردى. حالىقتىڭ سۇرانىسىنىڭ كوپتىگىنە بايلانىستى كىتاپ تەز تاراپ كەتتى. ءبىرىنشى تومى ءابىش كەكىلبايەۆتىڭ شىعارماشىلىعىنا ارنالدى. بۇل تومعا 13 اڭگىمەسى، 10 پوۆەسى، 3 رومانى، «ابىلايحان پەساسى» ، 660 ماقالاسى كىرگەن بولاتىن. ەكىنشى تومى جازۋشىنىڭ ءومىرى مەن ورتاسىنا ارنالعان. بۇل تومدا ءابىش اعانىڭ دۇنيەگە كەلگەننەن و دۇنيەگە اتتانعانعا دەيىنگى بارلىق ومىرىندەگى كۇن-كۇنىمەن، اي-ايىمەن بارلىق شىعارعان ەڭبەكتەرى، ايتىلعان پىكىرلەر، ساپارلار بارلىعى جازىلادى. ءبىزدىڭ پايىمداۋىمىزشا، بۇل ەكىنشى توم قازاقستاننىڭ 1950-1960-جىلدىق مادەني ءومىرىن قامتيدى. ەنتسيكلوپەديانىڭ اتى ءابىش كەكىلبايەۆ بولعانىمەن، ەنتسيكلوپەديا 1950- 1960-جىلدارداعى سوۆەت زامانىن سۋرەتتەيدى. مۋزىكا ونەرىندە ءشامشى قالداياقوۆتىڭ مۋزىكا ونەرىنە ۇلەس قوسۋى، قىز جىبەك فيلمىنىڭ ءتۇسىرىلۋى، قاجەت بولسا نۇرسۇلتان ءابىش ۇلى سياقتى ساياساتكەردىڭ شىعۋى - بۇل 1960-جىلداعى وقيعالار. ءابىش كەكىلبايەۆ وسى 1960-جىلدىڭ باسى-قاسىندا بولدى. تەك قانا جازۋشى ەمەس، قازاق رۋحانياتىن دا جىلت ەتكەن جاڭالىقتىڭ بارىنە ءوزىنىڭ سىني كوزقاراسىن ايتىپ وتىرعان. ەنتسيكلوپەديانىڭ 3-تومىندا قالامگەردىڭ ناقىل سوزدەرى توپتاستىرىلعان»، - دەدى عاريفوللا انەس.
مامانداردىڭ ايتۋىنشا، بولاشاقتا كىتاپ تەك قازاق ەمەس، باسقا تىلدەردە دە جارىق كورەدى.
ءابىش كەكىلبايەۆتىڭ ومىردەن وزعانىنا ەكى جىل بولسا دا قازاقستاننىڭ تۇكپىر تۇكپىرىندە جازۋشىنىڭ 80 جىلدىعىنا بايلانىستى «ءابىش كەكىلبايەۆ الەمى» اياسىندا ءتۇرلى شارالار اتالىپ ءوتىپ جاتىر.
ايتۋلى داتاعا بايلانىستى الماتى قالاسىندا ءابىش كەكىلبايەۆقا ارناپ كوشە اتى بەرىلدى. ءوزىنىڭ تۋعان جەرى ماڭعىستاۋ وبلىسىندا مۋزەي اشىلىپ، ەسكەرتكىش قويىلدى.